至尊重慶雞煲 Supreme Restaurant

寒流襲港，最好就係約齊三五知己去打邊爐㗎喇！烚下烚下暖笠笠咁好正㗎！聽聞有間雞煲好好味，係真唔係呀？即管去做白老鼠，為大家揭開真相啦！
晚上七點唔夠已經見人龍，睇來真係唔嘢少喎！

餐廳內環境寬敞舒適，之前仲想像會係坐到迫迫狹狹，圍住張圓枱果種添！估唔到有梳化椅，仲有梳化卡座添！

事不延遲，點餸先！食物款式都算齊全，tick晒就快快遞紙啦！

雞煲上枱！umm...好香呀！秘製醬汁同麻辣嘅味道陣陣撲鼻。趁啲火鍋料未到，我哋密密口咁食雞。啲雞肉質嫩滑，配搭埋重慶煮法，鍾意辣嘅朋友一定會食過不停~

我哋坐梳化卡座，座位就算坐6個人都好鬆動，所以都坐得幾舒服呀！既然係好友嘅生日飯，一於拆番餐勁嘅！

任食任飲，今晚一於不醉無歸！飲勝！XDD

食晒啲雞之後，加啲湯就開始打邊爐lu喂！~

火鍋料都陸逐上喇！有蘿蔔片、冬菇、炸枝竹、烏冬、粟米、唐生菜...

貢丸、脆皮腸、豬紅、雞子、滑雞片、龍蝦丸、芝士丸、淮陽凍豆腐...

豬潤，顏色幾新鮮喎！

美國肥牛

魚片頭、花膠、魷魚...

炸魚皮，卜卜脆！

黑豚腩片

用雞煲嘅湯底打邊爐特別野味，配料直情唔駛點辣椒豉油都已經好夠味~

食食下發現原來遠處有自助即包餃子可以攞，馬上去攞先！

即包餃子，歡迎自取

香芹豬肉餃

京蔥羊肉餃

洋蔥牛肉餃

仲有響鈴添喎！

由於兩小時嘅打邊爐時間有啲緊逼，我哋決定落晒啲料落去變一品鍋！夾喇夾喇！XDD

煙霧瀰漫之下，好友們都變得份外迷人~ XD

火鍋料任食，啤酒、汽水當然都係任飲啦！

不過要留意珍惜食物同飲品呀！攞走或者攞咗唔飲都要計錢㗎！@.@

另一個雪櫃仲有好多韓式飲品添！

嘩！呢邊吸引啲喎！一於試晒佢先得！XD

平日夜晚都可以座無虛席，一定有佢嘅吸引之處嘅~ 好飽好飽呀！要去行陣先再食下一餐~

飯後點少得甜品呢？食甜嘢係女仕們嘅專利嚟加嘛！^^

特別想介紹呢碗榴槤甜品，除咗兩球榴槤勁濃郁之外，糖水都好重榴槤味。食到同枱嘅好友都要避開晒我呀！~ XD (滿記甜品：朗豪坊4樓)

兩小時的確唔多夠喉！重慶雞煲真係好野味，今次叫小辣，下次可以試再辣啲。食完雞煲再打邊爐個湯底特別正，火鍋料算新鮮，最鍾意係啲即包餃子，好好味！試晒所有韓式飲品之後，樂天果款錫蘭檸檬茶最啱我口味，芒果汁都唔錯。睇番啲食評，見好多人彈服務差。但我又唔覺喎！屬於一般服務啦！畀呢個價錢，又冇理由要求酒店級服務嘅~我哋食過咗鐘，職員過嚟幾次提我哋都仍然好好禮貌咁話要交枱畀人。今餐食到好飽，好滿足！有機會都想帶埋晴朗再來食過呀！

至尊重慶雞煲 Supreme Restaurant
旺角店收費 (免收加一)：
星期一至四21:30後至23:00前入座：成人每位$128 / 小童每位$78
其他時段：
- 17:00 ~ 23:00 - 成人每位$158 / 小童每位$78
- 23:00 ~ 03:00 - 成人每位$118 / 小童每位$78
(星期五、六、日、假日及假日前夕每位另加$10)

旺角店：旺角彌敦道593-601號創興廣場16樓 電話：2148 2628
銅鑼灣店：銅鑼灣堅拿道西10號冠景樓2樓B舖 電話：2487 2968
元朗店：元朗又新街35號怡豐大廈地下6號舖 電話：2475 2338

Merry Christmas@樹屋田莊

We wish you a Merry Christmas.....we wish you a Merry Christmas...我哋今年聖誕節響樹屋渡過。自愉景灣Epicland同Spark Adverture之後，又再向難度挑戰喇！想睇下今次啲活動難唔難到我哋？跟貼啲，跟住嚟啦！
樹屋田莊位於大埔林村，即係大家好熟悉嘅許願樹附近。如果搭巴士響新塘站落，落車後再沿小路步行入去~

四周圍都係鄉郊地方，空氣特別清新！又可以親親大自然囉！wow~ hoo~~

冇惡犬，又冇牛屎味。一路行入去都好舒服呀！

唔駛行好耐，大概5分鏡嘅路程已經到達喇！

放低行裝後，職員向我哋講解營地注意事項~

講解完畢，要預備上裝甲喇！XD

小朋友都戴好晒安全帶，好醒目！準備接受挑戰啦！

活動一：泰山飛索

晴朗有咗上次Spark Adventure嘅經驗，今次再玩，已經唔駛再事前心理輔導喇！are you Ready???

朗朗飛喇！唔驚之餘，仲表現淡定！勇氣可加呀！

晴晴都一樣挑戰成功喎！

「難唔到我啦！Yeah!!!」

大人嘅重量同小朋友實在差太遠喇！晴朗爸爸「殊」一聲就飛咗落嚟！相都影唔切~ XD

一班挑戰者正等待飛，心情極度高漲呀！

呢位小朋友第一次玩就已經表現好好，就搵佢做model示範一下個過程啦！

Woo~ HOOooo~~ 飛呀！參與者需要步行至山坡上，再從山坡飛躍而下。職員可按你想要嘅速度而控制快慢，唔驚嘅話，梗係揀快啦！XD

活動二：奇妙橫水渡

想知玩咩？跟住嚟啦！

職員正講解玩法同需要注意嘅事項

原本諗住晴晴同晴朗爸爸一隊，而朗朗就同我一隊。估唔到晴晴勇於挑戰自己，實行自己一個揸船。過到對面敲鐘果下幾有滿足感呀？哈哈！

朗朗同我呢隊都出發喇！我哋決定以一站一坐嘅形式過河，全程由朗朗掌舵。好快就敲響個鐘喇！Yeah!!!

唔想掉低晴朗爸爸一個孤伶伶，我唯有捱下義氣玩多次啦！XD 甜蜜蜜隊出發囉！~~~^o^

玩完兩個活動，大家都肚餓，係時候補充一下能量。美味飯盒就係我哋嘅聖誕大餐，唔客氣喇！

聖誕節又點可以冇抽獎環節呀？每個小朋友都預備好禮物，交換禮物儀式即將開始~

排好隊，一個跟一個唔駛爭。人人有份，永不落空~

朗朗負責拎住隻聖誕襪畀小朋友抽出幸運號碼，究竟會抽到咩禮物呢？好緊張啊！

攞晒號碼啦嘛？去攞禮物囉！hohoho~~

嘩！份份都咁大份，開心死啦！Merry Christmas~

抽完禮物仲有啲時間，不如去池塘餵下魚丫！

只要即場「like」樹屋田莊嘅facebook page，就有一包魚糧送喇！快啲去餵囉！

晴朗都好享受餵魚魚。初時餵，魚嘅數量唔係太多~

但越餵會越來越多魚過來搶食，好墟冚呀！@.@

池塘中有好多鴨仔暢泳，泳姿幾咁優雅，環境幾咁悠閒。不過唔怕話畀你知丫！原來全部鴨仔都係假㗎！@.@ 但像真度極高，我哋都畀佢扼咗呀！

活動三：樹屋歷奇

重頭戲來喇！呢個係我哋最期待嘅活動~

小朋友正在聽職員講解，大家都好專心喎！

知道玩法後，戴上安全帶，預備爬樹喇！are you READY??

為確保過程順利，我呢個先頭部隊首先上去樹屋上面，小朋友一陣可能會需要到我呢個情緒輔導員㗎！^^

話咁快就爬咗上去~ Hello！大家好呀！

由高處望番落去，全部變晒細粒人，好搞笑~ XD

朗朗開始爬喇！加油！

無畏無懼！話咁快就爬到上嚟，做得好好呀！

上到嚟梗係要同棵樹影下相啦！影完又要接受第二個挑戰喇！

消防員預備出車救火，快啲瀡落去啦！Gogogo~~~

話咁快就一躍而下，果然好身手~ XD

晴晴都小心翼翼地爬梗上嚟喇！

似乎對於新挑戰都滿有信心喎！

瀡落嚟之後，面不改容，證明好玩又唔驚啦！

上到樹屋不忘停留一陣，影相之餘，更可細看樹屋內各樣別緻嘅裝飾~

屋內佈置簡撲得嚟又好有鄉村情壞，值得一看~

推開窗戶，仲有公雞雕塑。望出去會見到荒遠嘅窮鄉僻壤，就好似置身於世外桃園一樣，好舒服呀！

徇眾要求之下，要我瀡鋼管落嚟之際順便表演「港女十二式」。呢個係其中一式名為「隔空送吻」，大家接住喇！XDD (睇番都想嘔呀！)

活動完畢！朗朗話要去小賣部買嘢食喎！

好冰凍嘅冰菠蘿，好味呀！

臨走前，在營地自由活動。可以玩下攀架~

摛下樹木~

考下平衝力~

去兒童遊樂場放下電~

或者到樹屋下嘅搖搖床同瀡滑梯玩下~

咁就過咗富有挑戰性又難忘嘅一天。我哋嘅聖誕節都過得好快樂呀！YEAH!!!

樹屋田莊啲活動刺激又好玩，如果第一次玩嘅朋友都可能會怯怯哋㗎！當日有小朋友未玩已經喊定先，亦有爬樹屋中途喊住落番嚟，更有驚到三個活動都唔敢玩。其實好睇小朋友本身性格膽子大唔大，參與者之中最細嘅只得三歲幾，自己一個完成所有活動嘅能力都綽綽有餘。好叻豬！家長可以嘗試畀多啲鼓勵，小朋友只要衝破到恐懼，就會覺得好好玩㗎喇！好欣賞職員嘅耐心講解同細心照顧，對小朋友仲好有幽默感添！活動安全進行，我哋做家長嘅玩都玩得放心啲啦！有興趣去玩嘅朋友，最好預早訂營。因為佢哋啲營期真係好full！我哋今次活動係早半年前book嘅！冇誇張！6月果陣已經book定㗎喇！祝大家都可以好似我哋咁，在歡笑聲之下渡過一個難忘嘅歷程啦！

 樹 屋 田 莊 
地址：大埔林村新塘下村26A2
電話：(852) 2658 2618
網址：http://www.treetopcottage.org
facebook：https://www.facebook.com/treetopcottage