期待已久嘅澳門新濠影滙之旅，終於來臨！真係未出發先興奮呀！
睇下晴朗兩個嘅笑容，就知道幾咁期待啦！
早上9:15到達上環信德中心~
試過上次過澳門小朋友暈船浪嘅經驗之後，今次我哋早有準備~
兩日一夜，輕裝備ok啦！
星期六10:00船，好多人都襯假日過澳門玩呀！
早到碼頭劃啲位都靚啲，前後孖座，小朋友有窗口位梗開心啦！
藍天白雲，天氣好得很~
一個小時多啲嘅船程，見到澳門喇！
由於新濠影滙位於氹仔，我哋選擇乘坐金光飛航至氹仔碼頭。預備入境喇！
過完關，出到去即刻有酒店shuttle，堅正！
上車前，酒店職員派咗幾張即揭即獎咭比我哋，唔知會揭到咩嘢獎呢？巧緊張~
嘩！送雨傘、行李牌、紀念品同埋雪糕三文治呀！
落車後，又有職員上前送多幾張。今次仲正喎！有免費摩天輪搭添~
新濠影滙模型，好靚呀！
攞住咁多中獎咭，快啲去攞獎囉！不過原來21歲或以上先可以換領獎品，我同晴朗爸爸要響咁多張中獎咭入面揀兩張最正嘅，結果換咗兩張免費摩天輪飛。yeah!!!
攞完獎順便入埋新濠會，好似話響酒店食嘢會有折扣優惠㗎！
辦理check in，3點先有房，咁我哋攞啲行李去寄存先啦！
放低行李，鬆晒！周圍去行下~ 呢㗎可樂車響3樓，係一個小食部嚟呀！真係有個姨姨響晴晴後面賣梗飲品、小食㗎！
蒸氣動力直升飛船？令我諗起飛天紅豬俠添！我果個年代嘅戲，講你哋都未必識㗎喇！~ XD
第一個節目係「影滙之星」，天方地老，流連在摩天輪.... 摩天輪我哋就試得多喇！但8字形嘅，真係未試過喎！按圖可觀看更多~
肚餓訊號響起，係時候要四出搵食喇！嚟到新濠影滙想食得平靚正？按圖可觀看更多~
路過1樓嘅購物大道見到好多舖頭，有時間一定要嚟慢慢行下先得~
攞番啲行李，可以上酒店房lu~~
房間號碼20077，好心急呀！入去囉~ 入去囉~
晴朗已經急不及待四處進行大搜查喇！XD
我哋入住非吸煙房間，雙床房，間房幾光猛企理喎！
響呢張梳化度攤下都唔錯丫！
有枱有櫈。啱晒！我哋聽朝嘅早餐可以響度進行喇！
有咩嘢風景睇呀？
望到樓下3樓平台嘅花園~
晴朗太興奮喇！直情想拆咗人哋間房咁呀！XD
不如睇埋浴室丫！
企缸範圍內有提供洗頭水、護髮素同沐浴露
洗手盤附近亦有提供日常生活用品，有水、水杯...
毛巾、肥皂、lotion，一應俱全，都係一般酒店例牌會提供嘅物品啦！四周視察過之後，要預備換泳衣落去玩水lu~
點解會揀新濠影滙？因為想玩佢哋嘅「綠野游蹤」囉！it's SUMMER~~ 應該冇乜邊個唔鍾意玩水，我哋都係一樣，去玩水囉！咁先至係夏天加嘛！按圖可觀看更多~
玩完水，沐浴梳洗後，又要準備去下一個節目喇！
酒店有shuttle過銀河果邊，好方便！
分咗東線同西線，兩條線都去到銀河，見邊條隊冇咁長龍就排邊條啦！(可按圖放大)
上次嚟澳門食唔到群芳，一直想試好耐喇！食物真係好豐富，我哋去果陣仲做梗龍蝦主題添！正呀！按圖可觀看更多~
食飽飽番到酒店，不如睇番場蝙蝠俠都好喎！響香港真係睇唔到咁逼真嘅效果，係一次超現實嘅冒險飛馳旅程。值得推介！按圖可觀看更多~
晴朗冇得睇，唯有shopping下啦！一樣咁開心~ XD
4D影院隔離有間店售賣好多蝙蝠俠電影嘅產品
上一層亦有售賣華納產品嘅舖頭
一個鍾意蝙蝠俠，一個鍾意超人。啱晒！唔駛爭~ XD
呢個銀色圓球響冇任何支撐嘅情況下自己升降~
係咪好神奇呢？
嘩！好大部扭糖機呀！好巨型！
第一日嘅行程嚟到呢度，係時候要番房間休息喇！zzZz...zz..
第二天早上，在房間食過早餐就check out喇！搞掂好行李寄存又精神奕奕去玩lu~~~
每人每日可以抽一次獎，仲諗住晨早過嚟碰下運氣添！點知未開~ @@'''
啲禮品都好豐富㗎！不如等晴晴小姐為我哋介紹一下啦！
有現金獎(嘩！)、娛樂場消費券(嘩嘩！)、酒店住宿(嘩嘩嘩！)、門券......等等 (可按圖放大)
咁早周圍都冇人，我哋正大踏步向酒店嘅playhouse，係晴朗勁期待嘅環節。呢度唔只玩樂咁簡單，仲可以鍛鍊小朋友嘅鬥志同毅力，真係大人同小朋友嘅親子玩樂好地方呀！按以下圖片可觀看更多~
去旅行唔係玩就食，又要去祭下個五臟廟喇！冇諗過原來呢度啲service好到超晒班，不過今時今日咁嘅服務態度先啱加嘛！按圖可觀看更多~
食完未夠喉，仲去埋食甜品添！之前上openrice見到呢個millions cupcake已經好想試喇！果然冇令我哋失望。按圖可觀看更多~
夠鐘喇！魔術表演就快開始，行快啲啦！呢90分鐘嘅表演，簡直係一次超凡體驗嘅魔術旅程！AMAZING!!! 按圖可觀看更多~
酒店內到處都有我哋熟識嘅卡通/電影明星，靜係selfie都已經好忙碌喇！XD
快樂嘅時間過得特別快，又係時候講拜拜！
我哋預早咗45分鐘到達碼頭，冇上次咁趕，可以輕輕鬆鬆上船番香港lu~
今次新濠影滙之旅簡直係超精彩呀！
晴朗爸爸竟然響酒店抽中咗酒店住宿一晚呀！嘩！勁好彩囉！咁lucky，唔怪之得生命中會遇到我啦！XD
最後，比個行程大家參考下啦！
~ 第一天 ~
9:15 到達上環信德中心
9:30~10:00 辦理離境/等候上船
10:00~11:15 船程
11:15~11:45 辦理入境
11:45~12:05 搭酒店shuttle
12:05~12:30 玩大抽獎
12:30~12:45 Check-in/行李寄存
12:45~13:15 周圍行下
13:15~13:30 搭摩天輪「影滙之星」
13:30~14:30 「澳門食街遊」食lunch
14:30~15:15 上房換泳衣
15:15~16:45 「綠野游踪」玩水
16:45~17:15 沐浴梳洗
17:15~18:00 坐酒店shuttle往銀河酒店
18:00~20:00 「群芳餐廳」Dinner Buffet
20:00~20:15 坐的士返回酒店
20:15~21:00 睇「蝙蝠俠夜神飛馳」(同晴朗爸爸輪流睇咗兩場)
21:00~21:15「澳門食街遊」買手信
~ 第二天 ~
8:00~8:30 梳洗
8:30~9:30 房間內食啲輕便早餐 (麵包/杯麵)
9:30~9:45 check out/行李寄存
10:00~12:00 「華納滿Fun童樂園」
12:00~13:30 「鼎泰豐」Lunch
13:30~13:50 「糖癡」買糖+食甜品
14:00~15:30 「魔幻間」睇魔術
15:30~15:50 攞番行李
15:50~16:15 搭酒店shuttle去氹仔碼頭
16:15~16:30 辦理離境/等候上船
17:00~18:15 船程
重點注意：
- 如果大家諗住搭shuttle出去嘅話，要預鬆啲時間，我哋由酒店過銀河果程站站停，用咗半個鐘有多，搞到buffet都遲咗。好似我呢啲冇咩耐性嘅人，又遇著趕時間的話，唔駛諗，搭的士啦！
- 發現酒店好缸乏樽裝水賣，雖然酒店房有4樽細size嘅水提供，但飲晒就要落去3樓嘅可樂車或者2樓嘅「澳門食街遊」度買。試過去便利店賣晒，最後去咗McCafe度買，會貴少少。大家如果有小朋友更加要注意，可能要自備多少少水喇！
- 出發前可先到新濠影滙網站玩刮刮卡，我哋就刮到「華納滿Fun童樂園」8折優惠。想慳啲，梗係要精明啲~ 刮刮卡網址：http://goo.gl/raIC5A
- 如果諗住食buffet要早少少book，我哋都係出發前幾日先plan行程，想響淘寶book群芳點知已經full晒。最後直接打去酒店度book OK有位，但當然係貴啲啦！
- 聽聞酒店嘅「星滙餐廳」都唔錯，仲有我哋至愛嘅生蠔食添！下次去會考慮試下~
- 駕車人仕可考慮將車泊在上環林士街多層停車場，日泊$150+夜泊$50+假日日泊$90+1hr $20=$310
主要供應商：
(1) 明星旅遊 - 購買package包括明星滙1晚+影滙之星門券兩張+蝙蝠俠夜神飛馳門券兩張+金光飛航來回港澳船飛兩套，另外再買多兩套船飛比小朋友
(2) 淘寶「悠遊假期」 - 購買影滙之星門券兩張+魔幻間門券4張
我哋揀嘅未必係最平最抵，但用過覺得係穩陣嘅先推介比大家，可以當多個參考啦！祝大家旅途愉快！~
旅行費：
澳門package - $2596
金光飛航來回港澳船飛兩套 - $586
影滙之星門券兩張 - $84
澳門食街遊 - $201
群芳餐廳兩大兩小dinner buffet - $1373
華納滿Fun童樂園入場券兩張 - $320
魔幻間門券4張 - $1327
鼎泰豐 - $399
糖癡 - $110
買手信 - $360
的士 - $40
TOTAL合共：$7,396
http://blog.xuite.net/chinglongtin/blog/351743953
新 濠 影 滙
地址：澳門路氹連貫公路新濠影匯3樓
電話：(853) 8865 8888
網址：http://www.studiocity-macau.com/tc
