生產過程：朗朗的旦生

最近聽朋友分享佢嘅生bb過程，令我憶起第一胎嘅生產經歷。如果陀梗bb嘅妳不妨當多個參考，但唔好睇完怕咗生bb就得喇！

*********************************************************************

六年前的某一日
有人話砌好咗bb床仔咁bb就會趕住出世，所以我響35周果陣已經砌好咗。一直等，期待bb嘅來臨。結果等到37周已經進入咗足月嘅階段，更加可以放心咁等。日子一日一日咁過，但bb仲係冇動靜要出嚟。心情由期待變為擔憂。直至39周6天產檢嘅時候，醫生話如果41周3天都冇動靜的話就要入院催生。天啊！聽人講催生仲痛過自己生好多架！oh my God~

一日後，即40周正正呢日。一朝早去廁所發現見紅，由於係稀稀哋嘅，我唔肯定係咪穿埋羊水，所以冇沖涼洗頭。同老公食埋早餐、執好嘢就去醫院。

早上8:30
8點半入到產房做完驗尿、量血壓呢啲指定動作後，就有個女醫生插件金屬嘢入去我下面睇情況。結果真係穿咗部份羊水，送咗我入去產房嘅另一間房，訓響床度駁住bb心跳同宮縮儀器。由於我有妊娠糖尿，又要吊埋鹽水同禁飲食直至生。我記得我個袋度有包朱古力預備晏啲食架添！而家唔駛諗喇！只有訓響度等運到啦！

早上10:00
差唔多10點鐘，有個女醫生帶同一個護士嚟到，話要同我檢查下面。又畀佢塞咗件金屬嘢落去睇，跟住仲話要幫我穿埋其餘嘅羊水等我痛得好啲喎！吓...？但我唔想痛喎！可以點？....都..冇得揀。佢越篤越入，我就越嚟越痛，搞到我嗌咗幾聲。跟住最痛果下之後，就感覺到下面流咗好多暖嘅水出嚟。羊水終於穿晒，而家係等宮縮、陣痛嘅來臨喇！

瞓瞓下聽到出面啲嬸嬸、護士分梗西餅，有個姑娘問嬸嬸食唔食多件，嬸嬸話太飽唔要喇！聽到我真係好想嗌出去話畀件我啦！我好想食呀！

等呀等...等呀等....等極都未覺陣痛。等嘅期間好攰，我已經小睡咗好多次。

下午3:00
至下晝3點幾都仲未有陣痛，醫生決定幫我加催生藥。

下午4:00
大概4點，陣痛開始嚟料！初頭果兩個鐘我都堅持唔用任何止痛方法，一痛我就吸...呼.....。

傍晚6:00
直至6點幾，陣痛越黎越頻密，越來越痛得犀利，我開始要聞笑氣。老公嚟探病嘅時候，每當陣痛一到，傾傾下偈都要停落嚟去吸笑氣同呼吸好，等唔痛先再繼續傾。

晚上7:00
7點開始，陣痛越嚟越勁，我決定打第1支止痛針。打完感覺好啲，不過都係要繼續聞笑氣。

晚上10:00
痛到10點幾，支針藥力開始散，我催姑娘幫我打第2支止痛針。但因為未到打針時間，所以姑娘冇理到我嘅要求。

晚上11:00
終於忍受到11點，夠鐘打針喇！打針過後感覺又好啲，但陣痛真係好密，每隔兩三分鐘一次，我每次痛先去聞笑氣，呢個動作做咗不下100次喇！感覺真係越嚟越辛苦。HELP!!!

凌晨2:00
凌晨兩點幾，我再次催姑娘幫我打止痛針。但姑娘話我應該就嚟生得，拒絕咗我。心裡一沈，大鑊！咁究竟我仲要痛幾耐呢？真係痛到爆喇！結果call咗老公嚟幫我按摩背脊，但陣痛令我痛不欲生，要不停咁聞笑氣之餘又講唔到嘢。陣痛一來，我就係咁典床典蓆，當時真係痛得死去活來。姑娘幫我檢查過只開得5度，但我同姑娘講：「我要屙呀！快啲畀我生」。姑娘嘗試幫我生，教我陣痛一嚟就拉緊床邊嘅扶手，兩腳用力踏床尾塊板，深深吸口氣然後忍氣就屙。試咗幾次都唔成功，仲畀姑娘話生仔唔係咁易嘅事嚟㗎！好灰呀！之後又要繼續同陣痛博鬥過喇！

凌晨4:00
博鬥到凌晨4點幾，終於開夠10度，老公都入埋嚟陪住我。呢個時候，姑娘話我羊水混濁要兒科醫生到場協助。如果兒科醫生到，老公就唔可以繼續留響度陪產。醫生同姑娘不停咁提我點做可以屙個bb出嚟，我一痛就試...一痛就試...試咗好多次都仲係唔成功。當時痛到我都冇晒力，姑娘仲要嚴苛地話我呼吸得唔啱，又話我對腳冇用力....。老公響身邊見我痛到死都愛莫能助，只有在旁不停鼓勵我話一定做得到架！可能之前聞得笑氣太多，已經聞到high high哋，對身邊所有人同我講嘅嘢都反應得呆呆滯滯。我當時只係希望快啲屙咗個bb出嚟就唔駛再痛，唔駛再受呢啲苦。試咗十幾廿次都仲未屙到出嚟。正當我覺得最無助之際，一直在旁觀察果個醫生行埋嚟同我哋講我真係欠缺咗啲力氣，決定要用鉗輔助我鉗個bb出嚟。其實冇力都好正常，我冇食嘢同飲水就黎21個鐘喇喎！仲要而家係凌晨時份，係人意志力最薄弱嘅時候。我感覺身體就嚟負荷唔嚟喇！醫生講完，真係鬆咗口氣，終於有人會嚟幫助我喇！Thanks God~

兒科醫生到咗，老公被安排去出面等候，我最大嘅精神支柱走咗，不過都要頂硬上繼續努力啦！醫生幫我響下面打咗麻醉針，然後就塞咗件好大嘅金屬嘢落去我下面。再不時用手撐大啲下面，果一刻除咗陣痛，就係畀佢搞到勁痛，總之都係痛...痛...痛。陣痛一嚟我又要繼續做翻頭先嘅嘢，吸啖氣忍住就屙。我都唔記得做咗幾多次喇！都仲未屙得到bb出嚟。響最後一次，我真係忍住度氣忍咗好耐咁屙。跟住感覺下面撕裂爆痛，應該真係爆咗，但我都理唔到咁多嘢喇！只期望快啲完結。

清晨6:00
接近6點，我終於成功屙到少少bb個頭仔出嚟，加上醫生個鉗嘅輔助之下，屙晒成個出嚟喇！果種撕裂感好攞命囉！醫生一接晒成個bb就放咗響我個肚上面。當時對bb第一感覺係滑散散但暖笠笠，好sweet！之後，助產士、姑娘變得好忙碌，我亦聽到bb嘅喊聲喇！雖然仲係痛，但好開心！終於生咗佢出嚟喇！正當以為同「痛」可以講bye bye嘅時候，醫生話嚟梗要補針。我問醫生咩嘢嚟？佢就答我要鏠番好剪陰嘅傷口。呢個男醫生嘅耐性好好，望住我下面好有心機咁一針一針咁聯，就好似雕花咁。每一針都痛到我嗌咗出嚟，真係攞你命3000！足足痛咗半個鐘，終於告一段落。我被困產房22小時，相信今次經驗呢一生都唔會忘記，終於可以脫離鬼地方喇！

離開產房之後，有嬸嬸推咗我上產後病房，我記得果刻下面個傷口仲好痛。雖然已經上到產後病房，但竟然仍然聽到響產房果陣啲儀器聲同bb心跳聲，陰影好大。折磨咗實在太耐冇覺好瞓喇！好快瞓著。瞓到有個男護士過嚟問我個名，推住張床仔話「呢個就係妳個bb喇！」。我從熟睡中清醒過來，望住bb好似仲未好實在感覺佢就係我個仔咁，不過唔知點解不停會心微笑，果種開心嘅心情真係難以形容。BB~ 好感恩你可以順利來到呢個世界，要健康啊！

*********************************************************************

生朗朗嘅過程就係咁多喇！之前冇諗過自己個子宮會好似唔識收縮咁，要落催生。如果唔係咁，相信痛嘅程度會冇咁嚴重。不過點都好啦！當初堅持要順產，係因為想一嘗偉大母親既經歷。我記得生完之後，好決心第二胎一定要去私家開刀，但兩年後嘅事又冇人會知係點。聽好多過來人講話第二胎就唔駛痛咁耐，又唔駛剪陰，而且仲易生好多。隨著時間淡化陰影，漸漸就會忘記上一胎生得幾咁痛苦。欲知第二胎結果係咪去咗開刀？下回分解啦！