澳門科學館

媽媽們成日講澳門科學館好正又抵玩，但網上資料唔係好多，一直都好想親身去感受下點正法。機會終於嚟喇！順便介紹埋畀想去玩嘅媽媽啦！
我哋由威尼斯人搭shuttle去到澳門金沙落車，一直向海邊行就會到達科學館

已經見到藍色嘅科學館頂部喇！

過埋呢條玻璃橋，離目的地已經不遠

過完橋，左手邊見到晒整座科學館，正常會見到銀灰色嘅外牆，但工程進行中，變咗綠色@@'''

右手邊會見到觀音像，原來同科學館都幾近喎！

科學館三面環海，風景一流呀！

由金沙步行約15分鐘，到達科學館正門，見到條識郁嘅恐龍呀！

原來呢排做梗「恐龍活現濠江」活動，會有埋恐龍睇㗎！吼~~~

嘩！第一次咁近距離睇識郁嘅恐龍，就好似活生生咁，好有氣勢！

識飛嘅恐龍都有呀！

科學館有兩間餐飲店，一間coffee shop，另一間就係個view勁正嘅麥記喇！

入場參觀之前，晴朗被親子互動區所吸引，先在此放電~

又屋仔、又滑梯咁，睇怕有排都未捨得入場參觀喇！XD

咁大間屋一個人玩晒，好正啫！

過埋嚟玩下益智玩具啦！

排數字遊戲，考考腦筋時間嚟喇！

運用完腦筋，去舒展一下筋骨囉！

兒童遊樂場，又一放電好地方

玩飽遊樂場，入場參觀lu~ 晴朗對機械人好有興趣，停落嚟好專心咁聽梗佢介紹注意事項，唔通佢哋以為係真人嚟嘅？XD

太空科學廳 - 晴朗操控梗火箭發射...three~ two~ one~ GO!!!

模擬在太空嘅活動

仲可以一嘗駕駛太空船添！

太空人衣著

感受一下在月球漫步

星球發生大爆炸呀！

學習漩渦力

中國第一位太空人 - 楊利偉

向其他展館進發囉！gogogo~

兒童樂園廳 - 入咗去出唔出得番嚟㗎？@.@

企埋去就會自動幫你度高，好先進喎！

大玩遊戲機

又係考手眼協調嘅時候喇！

人工手動操控每一個機關，將啲木球成功運送至最高點，然後木球就會碌番落嚟㗎喇！

搖身一變，變身成為地盤工人

呢個地盤都請好多童工喎！XD

朗朗正努力起樓，咁應該可以同人講：「呢層樓我有份起㗎！」XD

入場人士一律要穿著安全衣物，見到佢哋3個著成咁，實在太似地盤工人喇！XDD

我趕住運送材料呀！

兒童科學廳 - 可以名正言順咁玩水lu~ 幾得意！小朋友響呢度一定會覺得好新奇有趣㗎！

科學快車廳 - 好大部火車！模擬到真嘅一樣~

又有遊戲機玩喇！

請緊握扶手！入到呢間房，所有窗都播放梗澳門嘅街景，就模擬到好似搭梗巴士一樣呀！

機械人廳 - 可以同機械人鬥智捉象棋，有冇信心贏先？

聲學廳 - 響呢度可以好好運用一下我哋雙耳朵，朗朗好搞笑囉！XD

地球廳 - 介紹一啲同我哋息息相機嘅地球小百科

仲可以感受一下滑雪添！

遺傳學廳 - 生物課嚟喇！

將啲細胞組織放番落細胞內適合嘅位置，幾有趣味性

環保廳 - 用腳嚟砌puzzle你又試過未？

模擬在澳門實景街道駕駛

無牌駕駛呀！~~~

揸完一部又一部，過足癮啦！

運動健康廳 - 同電腦打乒乓波

仲可以練習射擊添喎！

運動競技廳 - 又煲、又鑊咁，煮梗咩呀？

食物科學 - 介紹不同食物嘅知識

嘩！好多美食呀！如果真係食得嘅就發達囉！*o*

急步趕梗去天文館睇3d電影 -《我的恐龍時代》，片長45分鐘

開咗場喇！行快啲啦！

臨走順便入去禮品店逛逛

店內售賣好多同科學有關嘅貨品，好似機械人、飛行科學、錯覺科學、磁力科學、針孔相機、壓花藝術、鋁合金積木、環保科學系列等等

澳門科學館共有14個展覽廳，展出超過450件互動展品，主題包括兒童、科技、環境科學同埋生活等4個主要元素。啲展品幾得意同富有趣味性，可以引導小朋友享受探索科學嘅樂趣。媽媽們果然冇介紹錯！科學館仲有提供免費wifi同免費電子儲物櫃，我哋大包細包咁，放晒落locker先入場參觀。玩得輕鬆好多呀！

我哋本來預3小時在科學館玩樂，但七除八扣之下，得番兩小時。仲要睇埋電影，太貪心喇！其實3d電影同香港太空館所放映嘅效果差不多，如果唔夠時間都可以省略。我哋最主要行咗朗朗感興趣嘅太空科學廳，同埋響兒童樂園廳都玩咗好耐。之後就急步完成埋其他十幾個展廳，唔係影咗好多相，要留待大家去親身體驗喇！下次嚟，一定要預留充足啲時間先得。實行要慢慢玩，慢慢探索大半天呀！

 澳 門 科 學 館 
開放時間：星期一至星期日 10:00~18:00 (逢星期四及農曆年除夕休館，公眾假期照常開放)
票價：$25 (18歲以上至65歲以下人士)，$15 (18歲或以下、65歲或以上人士)，2歲以下幼童免費
地址：澳門孫逸仙大馬路澳門科學館
電話：(853) 2888 0822
網址：http://www.msc.org.mo

返回Encore澳門新濠影滙之旅(室內活動版本)：http://blog.xuite.net/chinglongtin/blog/451100263