2016年9月9日 星期五

波爾圖葡國餐 Porto Restaurtant

據聞波爾圖係全澳門最正嘅葡國餐廳,係真唔係呀?即管去試試證實一下呢個傳聞啦!
聽講話冇book位要等成個幾鐘,有冇咁誇呀?我哋有老有嫩,為安全起見,都係預早打去book定位啦!不過就算訂咗枱去到都要等一陣,大概10分鐘就入得去喇!


餐廳係一間小店,枱與枱之間相隔都幾近,坐得比較迫狹,但勝在樓底高感覺冇咁焗束。不過醉翁之意不在酒,對於一陣間啲食物仍然抱有厚望


牆上貼滿為客人推介嘅菜式


柔和嘅燈光、啡紅色磚,感覺好有葡萄牙風味


脆炸芝士馬介休球 - 香脆可口,而且入口即溶,但如果有醬汁點嚟食應該會更加好喇!


麵包焗葡國雞 - 麵包好巨型!包裡面有咖喱雞、薯仔同埋蕃茄,咖喱汁好惹味而且唔辣,連晴朗都啱食喎!咖喱雞上有一層薄薄嘅椰絲,令咖喱香味更濃郁。麵包超脆、雞肉又夠入味,好好味呀!食之前,店員仲細心幫我哋剪開脆包,咁就更加易入口喇!不過雞肉份量唔多,只得4-5件,我哋6個人唔夠分喎!XD


葡式焗乳豬飯 - 皮脆肉滑、肉質鮮嫩又肥美,仲有香噴噴嘅乳豬味道添!好香口呀!


血鴨 - 賣相綠綠哋顏色有啲嚇人,但原來好好食。個汁酸酸哋好特別,鴨肉煮得唔韌又夠入味,家人仲連啲汁都清埋添!所以我哋唔可以以貌取「食物」喇!


馬介休炒椰菜 - 睇落平平無奇嘅炒菜,幾有驚喜!馬介休炒出嚟嘅椰菜好好味喎!食得多肉,都要有啲蔬菜balance番下嘅~


特色焗軟殻蟹 - 按隻order,我哋叫咗兩隻。味道簡直冇得輸!炸得又脆又香口,加埋面頭嘅秘製醬汁,好味到dum一聲呀!大愛~


芝士薯蓉馬介休焗酥皮 - 馬介休嘅另一食法,非常好味!芝士好香,配上咸咸哋嘅馬介休,估唔到可以咁match。不過要留意!唔好以為係小食,一碟兩件,每件都大過拳頭㗎!


而且成個酥都係滿滿嘅馬介休薯蓉,人少去食就要諗過先喇!如果唔係,食完一道菜已經吃不下之後果啲就幣加火啦!XD


晴朗似乎都好喜歡葡國菜喎!


我哋今餐大滿足呀!

仲未安排到時間過澳門?睇住餐牌先啦!睇咗當食咗~ XD (可按圖放大)

果然名不虛傳,食物質素真係唔錯喎!晴朗最欣賞係麵包焗葡國雞,不停要添啲脆卜卜包食。食剩咗個麵包蓋已經冇晒咖喱汁喇!叫店員幫我哋添汁,佢哋都好樂意效勞呀!而我覺得最好味係焗軟殼蟹,而家諗番起都仲好回味呀!比起較為出名果幾間大型葡國餐廳,我反而鍾意去幫襯呢啲小店。細細間小店,食物整得有heart啲,我覺得仲好食啦!波爾圖可以話係去澳門嘅必食推介呀!不過去之前,記得要book定位喎!


 波爾圖葡國餐 Porto Restaurtant 
地址:氹仔舊城區地堡街泉福新村第1期第4座嘉開閣地下
電話:(853) 2882 3318

返回Encore澳門新濠影滙之旅(室內活動版本)http://blog.xuite.net/chinglongtin/blog/451100263

沒有留言:

張貼留言