MAMA Burger & Lobster

自從杜如風響電視介紹過日本嘅龍蝦包之後，香港牽起咗一鼓龍蝦包熱潮。成日見到朋友響大阪食龍蝦包啲相，好葡萄！決定響香港都要食番個龍蝦包至得呀！
MAMA Burger & Lobster位於長沙灣一個唔顯眼嘅位置，門外擺放咗幾張吧枱櫈，加上時尚嘅裝修，好有外國feel。與四周圍嘅舊樓形成強列對比~

進入店內，首先穿過一個酒吧。酒吧除咗擺放咗唔同品牌嘅酒同杯之外，枱面上仲擺放咗好多個裝滿糖果嘅玻璃樽~

相信係用嚟整甜品同飲品用㗎！好吸引~

餐廳座位唔多，地方亦唔算好大

但環境都算唔錯，幾有西餐廳嘅氣氛。四周都可以見到同龍蝦有關嘅東西，裝修十分有心思

一睇就知呢間餐廳係主打龍蝦嘅啦！

坐低之後，立即睇下order啲咩嘢先~ 初到此店，識揀梗係點有皇冠同讚好圖示嘅食物啦！(可按圖放大)

order好食物，望住廚房靜待食物嘅來臨，好期待呀！

MAMA fruity - 用熱情果、菠蘿、橙所製成嘅綠茶，仲要寫到明「Must try item」，點可以錯過呢？

水果茶唔太甜，飲得出啲鮮果味，好fresh！仲要有埋鮮果肉，好好飲呀！

新鮮沙律 - 沙律菜幾新鮮，而最好味係佢個沙律醋，甜甜酸酸咁，好開胃~

龍蝦湯同爆脆通粉都上枱喇！

龍蝦湯 - 主打龍蝦嘅餐廳，應該可以物盡其用，將大量用唔著嘅龍蝦殻、頭、尾去煮龍蝦湯，味道一定十分之濃郁。個湯好creamy，龍蝦味好出，海鮮味好重呀！不過份量只有半杯，十分之珍貴呢~

爆脆通粉(Cheese Macoronis) - 餐廳新出品！係炸到金黃色脆卜卜嘅芝士通粉嚟！外脆內軟，而且芝士味好強烈，食完一件接一件，停唔到口~

登登登...登~ 萬眾期待嘅龍蝦包終於出場喇！兩隻龍蝦鉗凸晒出嚟咁，賣相已經夠晒吸引~

滿滿嘅龍蝦肉，見到已經令人流晒口水。如果唔係要畀相機食先，肯定會一啖就咬落去喇！XD

切開佢慢慢嘆先~

份量十足嘅龍蝦鉗，正呀！烤過嘅牛油包，幾香脆。饀料調味唔會好重，仲可以食到龍蝦嘅鮮味，好好味呀！哎吔~ 唔記得咗同個包合照添！

食咗一部份先影，都好過冇啦！XD

餐牌內，仲有其他龍蝦嘅食物款式。原來龍蝦包正價$268，咁lunch嚟食抵好多喎！(可按圖放大)

All Day Lobster都好受客人歡迎，開邊龍蝦仔配埋蛋、蘑菇、蔬菜同麵包，好豐富呀！另外仲有迷你龍蝦漢堡同迷你龍蝦包配薯條嘅款式~ (可按圖放大)

甜品同飲品都吸引㗎！(可按圖放大)

呢款限量甜品有朱古力、棉花糖同macaroon，啱晒晴朗口味，下次一定要帶埋佢哋嚟試過先得！

酒精類飲品都好多選擇~ (可按圖放大)

其中以呢款最為突出，Minions樣子好可愛。三五知己共聚，一人一支唔駛爭~

店員服務好好，見到隔離枱位小姐嘅手袋冇位放，立即遞上一個竹籃。抵讚呀！

有興趣嚟試嘅朋友，要留意佢哋嘅lunch time同happy hour時間喇！

MAMA Burger & Lobster嘅龍蝦每日由加拿大空運抵港，所以龍蝦肉特別鮮甜。龍蝦包混合咗蛋黃醬、紅辣椒粉、檸檬汁同鮮橙汁做調味，夾入烤到香噴噴嘅牛油包中，冇得輸呀！入口啖啖肉，好好味，果然冇令我失望，簡直係一試難忘。另外，亦好欣賞佢哋嘅龍蝦湯，味道好濃郁，攞滿分呀！下次唔會再自己一個人嚟！一定要帶埋晴朗，又或約齊三五知己一齊嚟嘆番餐勁嘅先得！

MAMA Burger & Lobster
地址：長沙灣昌華街49號昌暉大廈地下6號舖
電話：3956 5440
facebook：https://www.facebook.com/mama.hongkong