chicken pocha韓國料理

朋友啱啱先去完韓國旅行，回來不久又話好掛住當地啲炸雞，之後就當然約齊好友為滿足佢嘅慾望啦！聽聞有間韓國菜小店啲炸雞整得唔錯，做朋友嘅即管陪佢癲下囉！
chicken pocha韓國料理雖然位於荃灣一個唔顯眼嘅位置，但店外有唔同菜式嘅相片，每道菜式都好吸引呀！就係咁畀佢吸引咗入去喇！~

店內只有幾張枱，座位亦唔算多

牆上貼滿客人光顧嘅相片，似乎都有不少捧場客喎！

好喇！點菜先~ 款式一眼睇晒，唔算太多，但款款都係韓國出名嘅菜式。我哋咩嘢都想試下，於是一口氣點咗8道菜。嘩！食唔食得晒㗎？XD

店員好快就為我哋送上幾碟餐前小食，醃蘿蔔同青瓜醃得酸味適中，亦都夠爽脆。唔單止開胃，仲可以作解膩功效添！

原味炸雞 - 外皮非常脆口，而且一啲都唔油膩，粉漿厚薄調較得啱啱好。雞肉嫩滑，有啲雞汁流出，好Juicy呀！味道恰到好處，唔會太鹹或者太淡。每件都切得差唔多大，而且冇咩骨。不過由於新鮮炸起嘅關係，熱辣辣上枱，小心食嘅時候會辣親條脷。愛吃炸雞嘅朋友一定會大讚呀！

部隊火鍋 - 新鮮食材配上微辣嘅泡菜湯底，只係食餸已經覺得好掂喇！特別欣賞鍋中嘅火腿，唔知係咪來自韓國嘅火腿呢？哈哈！

泡菜炒飯 - 飯炒得夠乾身，泡菜味道特別野味。配埋煎蛋同紫菜絲一同入口，幾好味喎！

原來我哋唔記得咗放個韓國麵落部隊鍋度呀！加番先~ XD

韓式炒粉絲 - 麻油香味好重，真係抵食夾大件~

涼拌豬手 - 豬手掩得好夠味，簿簿一片啱啱好係一啖嘅份量。配埋撈咗秘製醬汁嘅配菜，冇得輸！

仲有碟冷麵畀我哋配豬手食添！韓國人都好鍾意整色整水，響平平無奇嘅冷麵上加啲芝蔴粒就顯得份外精緻喇！

嘩！我哋個部隊鍋已進入最佳時候，快啲大啖大啖咁將啲麵「殊」入口囉！好「亞美成」呀！~ *o*

海鮮煎餅 - 餅底有啲濕，而且煎得唔夠脆，口感太粉。呢味稍為遜色，下次可以省略~ ^^'''

芝士蛋卷 - 蛋卷外形好靚，師傅煎得好好手勢。蛋上嘅網紋醬汁唔只豐富咗視覺，仲令到口感更佳，已經急不及待想放入口喇！

切開之後，啲芝士流梗出嚟！蛋同芝士一向都係絕配，加埋啲醬汁，簡直冇得彈呀！*o*

紫菜卷 - 食嘅時候仲係暖㗎！可見材料幾咁新鮮~

同食開嘅日本壽司味道好唔同，食得出韓國家庭風味。值得推介！

係咪睇到流晒口水呢？有興趣試下嘅朋友，可以睇定餐牌啦！

燒烤、鍋、湯、拌 (可按圖放大)

炸雞及小食 (可按圖放大)

麵餅、年糕、沙律 (可按圖放大)

飲品 (可按圖放大)

原來店舖老闆係韓國人，唔怪之得可以煮出咁地道嘅味道啦！無論老闆定店員都好有禮貌、熱情好客。由於食物太多需要打包一啲番屋企，佢哋仲會細心響發泡膠盒上穿個㝫，放好錫紙先畀我哋放食物，好細心呀！不過落order嘅時候遇著唔識中文嘅店員有啲溝通唔到，轉一轉channel用英文就ok。之後先發覺老闆識中文，早知搵佢點菜就唔駛用埋身體語言喇！呢度啲炸雞真係炸得好好味，朋友話整得好地道，我就覺得仲好味過大型連鎖店果啲呀！極力推介！佢哋有多種款式：BBQ、蒜泥醬油、原味、醃醬辣味、香蔥同醬油味。基於有朋友唔食得辣，所以我哋叫咗原味，下次好想試埋辣味呀！呢度唯一唔好係等待上菜嘅時間稍長，果然係有heart嘅小店，慢功出細貨。既然係香港難得一見嘅韓國地道小店，等耐啲都值得啦！支持小店經營，有機會我哋會再來過㗎！