2016年12月16日 星期五

懷孕日記・晴朗在肚子裡的十個月

懷胎十月,係每個媽媽最期待,或者係最回味嘅事情。回想起晴朗響我肚裡面嘅時間,會因身體變化帶來嘅不適而感到困苦,但又會為BB在肚內一天一天長大而滿心歡喜。期待BB來臨嘅日子,真係百般滋味在心頭。就等我回一回帶,同大家分享一下懷孕過程。對於正準備懷孕或正在懷孕中嘅媽媽可以作多個參考呀!

一切就從一支驗孕棒開始...

**由於以下落嚟嘅記錄包括咗兩胎嘅經歷,我會將陀住朗朗(哥哥,2010年出生,現時6歲7個月)嘅回憶highlight為藍色,而晴晴(妹妹,2012年出生,現時4歲10個月)嘅就用粉紅色標示。等大家睇得容易啲啦!^^

科技先進,而家驗孕棒已經發展到電子化喇!仲記得懷著晴晴嘅時候,懷孕兩週六天已經可以測試得到結果。驗孕棒上顯示我已經懷孕約3週,又真係幾準喎!大家可以記低「Clearblue」呢個牌子,我係響萬寧買㗎!屈臣氏或便利店都有售,唔難搵~

~懷孕第4週~

好多時都聽到有啲大肚媽媽會投訴坐車冇人讓座。但就係好邪!唔知係咪因為我著得比較鬆身嘅關係,未見肚就已經有人讓座畀我。不過都好多謝果位有心人士...大家如果見到大肚婆都記得要讓位喇!^o^

~懷孕第6週~

老公知道我「恨」生女「恨」到暈,所以送咗份小禮物畀我。粉紅色嘅bb襪仔,襯晒囡囡啦!


口味開始會有轉變。陀梗朗朗嘅時候,去親飲茶都好鍾意食鳳爪,但以前我唔會食㗎!亦都唔會食麥記、杯麵、公仔麵等冇益食物。但竟然食得多咗,仲成日心思思又想再食添!(陀仔比較鍾意食咸嘢,又鍾意香口嘅食物)


到陀晴晴果陣,調番轉好鍾意食酸辣米線,又鍾意食糖、朱古力之類。慘喇!仲唔肥屎我?(陀女較偏向酸、辣、甜嘅味道)


懷孕初期,每星期都會去兩次糖水舖飲桑記生蛋茶,可以有助安胎。搵啲舊式啲嘅糖水舖就有㗎喇!

~懷孕第7週~

響eBay訂咗部胎心機番嚟!咁就可以時時刻刻聽到bb心跳聲啦!不過太早聽唔到,唔好自己嚇自己,大概要16-20週先會聽得清楚啲~


第一次去私家度照超聲波,扁扁哋膸圓形果個係胎囊,即係bb住嘅屋企。圓形果點係營養球,作用係為bb提供營養架!


Zoom近啲個胎囊畀大家睇下,見唔見到晴晴呀?XD


好模糊果個影就係晴晴喇!醫生正量度梗佢嘅長度~

~懷孕第8週~

第1次同朗朗接觸係響第8週,黑色腰豆形呢個就係胎囊喇!


胎囊裡面有一忽白色嘅影,係朗朗嚟呀!有1.55cm長~


仲記得懷孕初期成日估bb係仔定女,所以都上網搵過一啲資料。資料顯示可以從7至10週嘅超聲波圖片估計出bb性別,方法係睇bb嘅胎囊形狀。如果胎囊長並呈腰豆狀就多數係仔,朗朗果幅超聲波又真係好似腰豆喎!如果較為圓扁型就係女,晴晴果幅的確唔似腰豆,係圓圓哋扁扁哋咁嘅~ 呢個方法幾有趣,但當然未經醫學證實啦!不過對於心急想知道係仔定女嘅媽媽嚟講,不仿參考一下~^^

~懷孕第10週~

同老公行開汽車用品店一齊揀咗呢個裝飾掛響車度。車出車入都好似向全世界說「我升呢成為大肚媽媽喇!」~ XD


陀住晴晴第一次去健康院產檢,已經聽到胎心聲。健康院啲聽胎心儀器唔同私家果啲咁先進,一般冇咁快聽到,朗朗果陣都冇咁早。可能係第二胎嘅關係啦!當刻我同老公邊聽邊笑好開心呀!

~懷孕第11週~

第2次同朗朗接觸,今次開始聽到心跳聲喇!強而有力嘅節拍!


朗朗大個咗好多,上次先得1.55cm,今次有4.24cm喇!


我問醫生bb幾時先會識得郁架?醫生話bb瞓梗覺zZzz...跟住醫生郁下我個肚,嘗試叫醒朗朗,真係醒咗喎!仲腳仔踢踢添!好精靈活潑呀!


呢個表係mark住每日嘔嘅次數,由第8週開始嘔到而家。食咩嘔咩,嘔咗成個月真係有啲辛苦!相反陀住晴晴嘅時候有時係個胃頂住好辛苦,頂到好多胃氣,勁想嘔!但最終未嘔過。可能呢啲就係陀仔同女嘅分別啦!


其實嘔都好需要能量,空肚嘔仲辛苦。呢啲就係陪住我渡過嘔吐期嘅食物,寶礦力沖劑加溫水開嚟飲,感覺真係會好啲㗎!

~懷孕第12週~

第一次半夜三間3點幾嚟食杯麵,冇辦法!瞓瞓下覺真係好肚餓,bb都好大食喎!XD


將有咗嘅消息通知公司,啲同事都戥我開心呀!仲走晒過嚟恭喜我,成朝都忙過不停接收祝賀。咁開心!下晝一於萬歲啦!


陀晴晴嘅時候都有在宣佈喜訊後請下午茶,仲試咗sift出品嘅蛋糕同macaroon添!冇令大家失望,好好味呀!


要開始搽肚紋膏喇!唔知關唔關事,我個肚生完bb後真係冇咩肚紋,仲見得人喎!想要靚真係唔懶得㗎!

~懷孕第13週~

去威爾斯進行唐氏綜合症檢查(OSCAR),即係度下bb頸皮嘅厚度來估計bb患唐氏綜合症嘅機會率。估唔到朗朗又大個咗咁多,上次4.24cm,今次有7.46cm喇!等咗差不多兩個鐘,終於有結果。結果顯示朗朗患唐氏嘅機會很微,又過一關喇!yeah~

~懷孕第15週~

陀住晴晴第一次有人讓座畀我,第二胎真係會快啲現肚呀!咁快被人label咗係大肚婆~ XD

~懷孕第16週~

又同晴晴有個約會喇!照超聲波嘅時候,醫生話八九成似係女。佢zoom近bb果度同我數有三劃,係女仔生殖器官嘅最初形。走果陣仲提我可以開始買定啲bb女衫添!睇嚟醫生都好有把握喎!終於可以有機會一嘗幫囡囡扮靚嘅超大欲望,唔駛再「恨」人哋「恨」到口水流。真係堅開心!^o^


平時行百貨公司嬰兒部見到啲女仔衫真係好「恨」呀!而家有機會可以買喇!果種期待同興奮嘅感覺真係超正!yeah~


婚後一直打算將啲金器留番畀第時個女,估唔到真係可以成真喎!興奮嘅感覺維持咗好一段時間~


人地話結婚可以令妳成為一日嘅公主,陀bb可以令妳成為十個月嘅皇后。有咗bb特別感覺到身邊所有人嘅關心同愛護,感覺好幸福呀!

~懷孕第17週~

仲記得陀住朗朗果陣,第一次照超聲波照到bb性別,我不得不接受呢個事實,bb係有何b仔架!嗚~ 聽到果一刻的確係有啲失望。不過醫生話各樣都好好,朗朗有半磅,真係快高長大。其實健康先係最重要,仔定女都已經唔緊要喇!


第一次從網上見到呢幅相嘅時候,印像好深刻。上星期見醫生果陣,話我好快就會感覺到胎動。好興奮呀!之後成日都摸下個肚,感覺下朗朗幾時會踢我。但仲未有感應,好期待呢!

~懷孕第20週~

胎動喇!突然感覺個肚有嘢郁,好似有條金魚響裡面彈下彈下,彈咗我幾下咁。終於感覺到胎動喇!開心到笑咗出嚟!不過第一胎係會遲少少,陀晴晴果陣18週就已經胎動喇!


買咗部胎教機,聽聞用咗佢,bb出世後係會比較聰明、富想像力同埋情緒穩定啲。每次箍住佢響個肚,開機會播出不同節拍,朗朗就響我肚裡面好活躍咁踢,感覺都幾開心!不過有冇用就見人見智。如果話朗朗聰明同富想像力都尚可以,但情緒穩定呢part好有保留。佢係一個極度難湊嘅bb,起身又喊、瞓瞓下醒咗又喊、抱住都可以喊。總之就係好難頂啦!其實感覺好似冇咩用,而且再冇咁多恆心每晚使用,所以陀晴晴果陣冇用過喇!反而晴晴好湊好多,點解會咁嘅呢?唔用仲好~@@'''

~懷孕第21週~

網上bid咗啲bb音樂CD,一開始聽,朗朗就顯得好活躍,不停咁踢我。睇黎好鍾意聽音樂咁播!


照超聲波好明顯見到晴晴隻手仔,好似同我哋say hello咁呀!哈哈!


連隻臭腳都照得好清楚,kawaii呢~


側面輪廓似爸爸多啲喎!


響肚入面已經動作多多喇!睇下佢個托腮樣,好似沈思梗咁~


睇睇下仲要令轉面,好似怕睇蝕咗佢咁呀!XD

~懷孕第22週~

陀女中期口味又轉變到好鍾意食西餅、蛋糕,每日都要食過至安樂。陀女嘅口味就係我致肥嘅原因喇!...@.@

~懷孕第23週~

不過好彩番健康院嘅時候,姑娘話我keep個磅數keep得幾好。仲記得陀住朗朗果陣諗住大肚都必定肥㗎啦!就不停食,搞到有埋姙娠糖尿。第二胎就醒喇!唔好咁放縱,要繼續努力呀!yeah~ ^^V

~懷孕第24週~

踏入BB腦部開始發展嘅階段,要食魚油丸喇!我響萬寧買,兩胎都有食,其實唔知有冇效,但食咗感覺會良好啲~ XD

~懷孕第25週~

今次照晴晴嘅時候,佢「mark」大個口仔,好似想講嘢咁呀!


跟住仲識得同我哋笑添!睇到我哋好興奮。每次照超聲波之前都會超級期待㗎!

~懷孕第26週~

距離朗朗出世大概仲有3個月,係時候開始買下啲bb嘢喇!買咗啲衫仔、和尚袍、包被同grobag。大滿足呀!

~懷孕第27週~

會展同吉之島都做梗bb展,精明一族就梗係襯低吸納啦!買咗4個十字咀嘅奶樽、奶樽消毒液、消毒奶煲(送4個奶樽)、奶粉格、bb濕紙巾、沫咀仔濕紙巾同埋奶樽刷+奶咀刷。晴朗爸爸又一頸血喇!XD


見質料幾好,又去吉之島買多兩套和尚袍,仲有帽仔同手套、腳套仔添!


人哋話大肚婆運氣特別旺,不嬲冇抽獎運嘅我,竟然響公司Annual Dinner抽中頭獎喎!有$2500 CASH~ wow~ hoo~~ *o* 母憑子貴,陀仔真係特別旺!


我哋家有養狗狗,係時候要畀狗狗熟習下屋企多個新成員喇!務求認真實習,買咗個bb公仔番嚟!拍下佢會識得不停咁笑,不時抱下佢、扮下餵奶、同bb玩下。多啲呢啲動作同埋響起bb嘅聲音,希望幫狗狗早啲習慣一下屋企多個bb嘅生活~


又到超聲波時間,今次同朗朗照4D,可以望到朗朗個樣清楚啲。見到佢有個大鼻同大咀,睇嚟似爸爸多啲喎!仲食梗手指添!好得意呀!


照照下朗朗用兩隻手摭到實一實,唔通呢個係怕醜仔嚟嘅?

~懷孕第28週~

襯住吉之島大減價未完,諗到爭啲咩又走去入貨。今次買咗bb洗衣粉、沖涼液、洗頭水、洗奶樽液、爽身粉盒、爽身粉同埋兩對襪仔。又放血喇!XD


護協買嘢都好平㗎!買咗bb專用清潔綿、尿墊、綿花球、指甲鉗、奶咀鏈、棉花棒、鼻孔清潔器、bb油、安心假奶咀、餵奶面巾同紗巾。新成員加入真係要買好多嘢呀!

~懷孕第29週~

第二胎個肚真係大得快,一般32週後個肚先夠大去studio影相,29週就已經籮咁大喇!


響淘寶訂咗啲靚靚口水肩同埋幾條公仔吸汗巾,仲有一啲紗巾同餵奶巾添!我都係生bb先識玩淘寶㗎咋!XD

~懷孕第30週~

陀女後期口味又變得好鍾意食雪糕,尤其係Haagen-Dazs既double chocolate三文治,簡直係每餐飯後都想食呀!


得閒就要執定「走佬袋」,預備隨時生得果陣就快手快腳拎入院丫嘛!一早準備好,總好過臨急抱佛腳啦!第一胎係咩都緊張啲,第二胎36週先走去執。好彩果陣未生得咋!

~懷孕第31週~

適逢吉之島聖誕8折大減價,要開始入定晴晴啲必需品喇!第二胎買嘅嘢少好多~

~懷孕第32週~

行千色店買左呢樣嘢,據聞用咗可以將洗衣機清潔得乾乾淨淨。之後就可以洗晒朗朗啲衫仔同被鋪喇!


我哋屋企係頂揭式洗衣機,所以跟住3號嘅指引去做就可以將洗衣機徹底清潔。用過先知原來用開果部洗衣機係咁污糟㗎!大家都不仿買嚟用下,洗乾淨先去洗啲bb衫仔啦!

~懷孕第33週~

今次晴晴摭住塊面仔扮怕羞妹,睇唔到佢個樣添!不過好開心,醫生話已經有4磅8喇!


朋友送贈嘅揹帶,係我鍾意嘅款式,相信朗朗都會鍾意啫!


啲牙肉痕痕癢癢,懷孕後期係需要補充多啲鈣。睇嚟每日一支鮮奶已經唔夠,要加碼先得喇!

~懷孕第34週~

中醫角度嚟講,好多被稱為涼嘅糖水,在懷孕初期禁止食用。好似話太涼會影響胎兒喎!但懷孕後期可以開始食番,仲有清胎毒功效添!實在太開心喇!好耐冇食過lu~ 我開始每星期自製一款糖水,整過腐竹雞蛋糖水、芝麻糊同埋綠豆沙,每日仲有新鮮即磨低糖豆漿。下星期試下整冰糖雪耳木瓜糖水先~


終於將朗朗啲衫仔、手套、腳套、襪仔、床單、被鋪、面巾、浴巾、紗巾...全部都洗好晒喇!


為咗朗朗而買嘅4格櫃筒塞到爆滿,自己買嘅衫仔+姑奶送嘅都已經霸佔咗兩格,仲多衫過我自己呀!


據聞白蓮鬚對清胎毒好有功效,唔知關唔關事,晴朗出世後冇咩皮膚上嘅問題。由30週起,每星期飲兩日,每日兩碗。去一般藥材舖就可以買得到白蓮鬚,我買一兩可以煲兩次。加啲冰糖同雞蛋就煲好,好easy!網上都有好多白蓮鬚食譜,大家不仿search下。不過亦有人話白蓮鬚較寒涼,唔係個個孕婦都適合。食之前最好向中醫查詢,咁就食得至安心啦!

~懷孕第35週~

人哋話大咗肚嘅女人特別靚,但我就覺得"I am too FAT"~ 不過一生人冇乜幾多次大肚,即管去留一留倩影啦!


之前響吉之島買嘅bb浴盤送咗嚟!可以模擬一下幫bb沖白白喇!


世上只有媽媽好!媽媽為我預備咗啲薑皮,等我生完bb可以用嚟煲薑水沖涼。好窩心呀!

~懷孕第36週~

聽其他媽媽講呢款茶包對上奶好有用,第一胎果陣我係一個唔夠奶嘅窮媽,人奶+奶粉餵咗一年。為第二胎做足準備,期望可以成為全人奶媽媽。生完晴晴之後,響醫院已經立即開始沖嚟飲喇!結果真係如我所願做咗全人奶媽媽。不過我又覺得未必關茶包事,都係密密埋身餵bb,勤力啲仲實際啦!


為避免狗狗啲毛毛影響初生嘅朗朗,去吉之島買咗個門欄番嚟裝響睡房,狗狗要開始習慣出廳訓喇!乖~ 就嚟做人家姐,媽媽一樣咁錫妳架!^^

~懷孕第37週~

坐月子媽媽飲用一般凍滾水係會寒涼,對身體唔好架!晴朗爸爸特別為我炒咗啲米,用嚟整炒米水飲。好易整!慢火將啲米放入白鑊炒,變金黃色就完成。我兩次坐月都係飲炒米水,傳統嘅嘢跟咗冇壞嘅~


保溫壺都預備好!咁我一生完bb就有炒米水飲啦!做法好簡單,將一湯匙嘅炒米加入去一大壺滾水度焗。鍾意嘅仲可以加啲桂圓肉,焗大約10-15分鐘就飲得㗎喇!


適逢母親節,去油站入油嘅時候,職員見我大肚送咗一朵用毛巾製成嘅康乃馨。仲同我講咗聲「母親節快樂」添!第一次有人咁同我講,唔係好慣,但好開心呀!


奶奶嚟我屋企食飯嘅時候,代朗朗送咗束鮮花畀我。快將做人媽媽嘅感覺越來越強烈喇!


奶奶煮咗兩個月嘅薑醋已經進入尾聲,十二朝過後就可以派畀親朋戚友食。聽奶奶講,先煲薑煲個令兩個月,預產期之前約20日落雞蛋(烚好去殼),等生咗bb之後一星期先落豬腳。我奶奶仲會落啲晴朗爸爸喜愛嘅雞腳,好好味㗎!另外,又會落埋咸蛋添!咸蛋(連殼)煮一兩日後就食得,味道會變咗甜蛋,好特別㗎!大家都可以試試丫!^^

~懷孕第38週~

啲床單被鋪洗乾淨同晾乾晒!搞掂好朗朗張床仔喇!


買咗第一件玩具畀朗朗,番到屋企已經急不及待要裝好佢。話咁快就裝好咗!係有天花燈光投射、音樂同埋公仔轉動嘅玩具呀!咁先似番張bb床加嘛!

~懷孕第39週~

購自永安大減價嘅BB車都送咗嚟喇!放埋bb公仔咁推出街,啲人會唔會以為我傻㗎?XD

~BB出世喇~

朗朗在40週零1日順利誕生


晴晴在38週零5日順利誕生,第二胎真係咩都早啲~ ^^'''

懷孕就好似打機咁,每一關都好緊張,過咗關鬆口氣,好快又要再接受新挑戰。心情有時仲會好似坐過山車,大起大落。呢個期間係特別需要家人嘅支持同關心,我記得有段時間差不多晚晚瞓瞓下覺腳抽筋到要晴朗爸爸起身幫我按摩。懷孕初期亦會嘔到冇晒胃口,情緒有時仲會好難控制添!不過無論如何,孕媽媽對於bb嘅來臨都會充滿期待同盼望。

十個月嘅皇后生活過後,就會變成十級奴隸。湊bb嘅時候,靜係開奶、餵奶、洗奶樽、換片、沖涼都忙過不停。捱夜餵夜奶仲會搞到冇覺好瞓添!哈哈!不過又唔駛咁擔心!女人與生俱來就有一種好強烈嘅母性。雖然照顧小朋友有時係幾辛苦,但係見到佢哋笑,個心就會被溶化,會覺得好開心同值得㗎!新手爸爸、媽媽遇著第一胎係咩嘢都會緊張啲。我第二胎嘅時候算係有啲經驗,變得輕鬆好多,去照超聲波都冇照得咁密呀!其實心情放輕鬆啲對個胎都好啲啦!最後,唔好話我有好嘢收埋收埋,送埋個懷孕錦囊畀大家喇!

1. 驗到自己有咗點算好?
如果你用驗孕棒驗到自己有咗,跟住就去普通嘅私家診所再驗一次,醫生會寫張懷孕證明信畀你。然後就打去book健康院/醫院啦!約一間就近嘅健康院/醫院做產前檢查:
http://www.fhs.gov.hk/tc_chi/centre_det/maternal/maternal.html
網頁內有講首次登記應該點做同埋產檢需要帶啲咩嘢。有唔明就直接致電健康院/醫院查詢啦!

2. 幾時要照超聲波?
響政府產檢只會幫你照一至兩次超聲波。如果想穩陣啲,最好一邊睇政府,另一邊睇私家。以下係幾時要照超聲波同埋照啲咩嘅資料:

第1次 - 睇心跳
- 8-9週,推斷預產期,檢查有冇宮外孕或懷有雙胞胎

第2次 - 唐氏綜合症檢查 OSCAR (現在所有政府醫院已為孕婦免費提供此服務)
- 11-14週,量度bb頸皮厚度,再根據孕婦的歲數,估計bb患唐氏綜合症的機會率
- 亦可以睇到有咩大毛病,例如頭骨係咪完整等等

第3次 - bb的性別 (選擇性,可以唔照)
- 16週,照到bb係男仔定女仔,但都要視乎bb手仔或腳仔有冇摭掩住生殖器官
- 可以睇到手指、腳趾等各方面嘅發展

第4次 - 照結構 (政府醫院可能會視乎孕婦是否高齡或高危才會免費提供此服務)
- 18-22週,胎兒體內的檢查,睇下bb有咩唔妥,檢查心房、膀胱、腎、腸有冇問題
- 亦可以睇下腦部發展係咪正常,有冇兔唇,手指腳趾係咪齊全,腳有冇屈起等等

第5次 - 量度發育進度
- 30-32週,如果發現bb比較細,再測試進度係咪正常
- 量度bb身有幾長,再同20週前的長度作比較,可以計算bb的成長進度
- 檢查有冇出現前置胎盤問題

3. 邊度可以入BB/媽咪會?
如果想入多啲bb會攞下試用裝或者優惠,可以上網或fax登記入晒所有會:
美國雅培媽媽網站:https://club.abbottmama.com.hk/register.php
Fitti:https://www.hk-seo.org/fb_app/fittihk1/phone.php
Frisocare 美素佳兒會:https://www.friso.com.hk/hk/frisomumclub
Heinz 亨氏BB會:http://www.baby-kingdom.com/promo/heinz/2007apr/index02.html
Huggies BB會:https://www.hk.huggies.com/Register
Karihome 卡洛塔妮:http://member.karihome.com.hk
Meadjohnson 美贊臣會:http://register.meadjohnson.com.hk/mamaclub/register.php
Nepia 妮飄:http://www.hschan.com.hk/promotion/WEBSITE%20NEPIA.htm
Nestle 雀巢BB會:https://www.nestlebaby.hk/user/register
Pampers:http://pampersbbclub-hk.com/BBCregistration
Sealer 噓噓樂BB會:http://image.baby-kingdom.com/images1/sealer_form_sept07.jpg
Snow White 雪印家庭:http://www.snowbrand.com.hk/family.php?Cat=1
Suzuran 思詩樂BB會:http://www.suzuran.com.hk
Swissological 瑞士寶寶樂天會:http://www.swissobaby.com/catalog/create_account.php
Top-Be會:http://www.prominentwing.com/topbe.php?language=chh&view=application
Wyeth 惠氏媽媽會:https://www.community.wyethnutrition.hk/Account/Register
香港母乳育嬰協會:http://www.breastfeeding.org.hk/user/register

4. BB用品要買啲咩?
到bb大約28週左右就要開始買bb用品同埋執定「走佬袋」架喇!我果陣就預備咗以下物品:
初生嬰兒用品 - 奶樽(8-9安士) 6個、奶樽(4安士) 兩個、消毒奶煲 1個、消毒清潔劑 1支、奶樽鉗 1個、清潔奶樽刷及奶咀刷 1套、安心假奶咀 兩個、奶粉格 1個、探熱針 1支、耳溫計 1個、和尚袍(全棉) 6件、長袍或兩用袍 4件、外套 兩件、手套 兩套、腳套 兩套、包被 兩件、帽子 兩頂、襪子 兩套、熱水壺(出街使用) 1個、嬰兒指甲鉗/較剪 1個
清潔及衛生品 - 浴盤 1個、毛巾及面巾 兩套、紗布巾 1打、洗頭水及沐浴露 1套、棉花棒 1盒、棉花球 1包、濕紙巾 1盒、BB油 1支、凡士林 1樽
產後及哺乳用品 - 產婦衛生巾 4包、網褲或紙內褲 兩包、哺乳胸圍 兩個、乳墊 兩盒、電動揼奶器(雙揼) 1個、床墊 兩包、
水泡座墊 1個、束腹帶 1條、除肚紋膏 1支
家居及戶外用品 - 嬰兒床及音樂吊傘 1套、被鋪+床圍+床笠+枕頭 1套、枕頭+攬枕+毛毯 1套、隔尿墊 兩張、手推車 1架、餐椅 1張、汽車座椅 1個、揹帶 1條

5. 走佬袋要執啲咩?
孕婦用品:紙巾 兩盒、大毛巾 兩條、面巾 兩條、產婦衛生巾 兩包、胸圍 兩個、乳墊 1盒、網褲(3~6個) 兩包
嬰兒用品:初生嬰兒紙尿片 1包、棉花球 1包

6. 有用連結:
受孕期計算機:http://family.esdlife.com/pregnancy
懷孕每一週的轉變和注意:http://www.baby-mo.hk/pregnant.php

7. 產前講座:
有啲醫院會提供免費產前講座,懷第一胎嘅媽媽一定要去聽下,好有用㗎!詳情可向健康院或醫院查詢。

祝預備懷孕或正在懷孕中嘅媽媽好孕!生個肥肥白白、健健康康嘅bb出來喔~

你或者會有興趣睇埋我生晴朗嘅過程,可到以下網址重溫!^^
朗朗的旦生 - http://blog.xuite.net/chinglongtin/blog/442307534
晴晴的旦生 - http://blog.xuite.net/chinglongtin/blog/444117262


晴朗 - 食·玩·育·美·愛の親子平台
facebook專頁:https://www.facebook.com/happytrain123
blog:http://blog.xuite.net/chinglongtin/blog

沒有留言:

張貼留言