【抵食放題】大井町日式放題 Ooimachi Japanese Buffet

好多朋友都鍾意食日本嘢，我哋都係呀！因為食物賣相吸引、食材新鮮？定一話係回味梗上次去日本旅行啲嘢食呢？無論咩原因都好，總之一聽到去食日本嘢就開心㗎喇！最近，我哋去咗一間日式放題餐廳，抵食又好味，冇理由唔介紹畀大家㗎？ 
「大井町」位於荃灣眾安街，一條人流極高嘅街道，無論平日定假日都見佢大排長龍呀！

餐廳在3樓全層，地方好大，座位咁多都可以晚晚爆滿，你話係咪堅過石堅呢？XD

我哋晚上6點幾到達，食頭水。肚餓到咕咕聲，快啲點嘢先~

menu彩式印刷，好精美喎！有齊晒每款食物嘅相睇，唔怕落錯單~

落好晒單，就出去打個轉。原來餐廳有個自助區提供食物同飲品，睇睇有咩啱心水先~

水果有西瓜、哈蜜瓜同菠蘿~

沙律吧有多款蔬菜同醬汁~

甜品櫃有好多日式和菓子呀！

仲有唔同款式嘅泡芙、蛋糕同奶凍添！

飲品有橙汁、蜂蜜柚子汁、蘋果汁同竹蔗茅根~

如果唔夠，過去雪櫃仲有好多罐裝飲品選擇㗎！

暖嘅飲品都有埋，真係照顧周到喇！

攞完飲品，食物已經陸逐上枱，同大家逐一介紹下啦！

刺身：

我哋叫咗多款刺身，有三文魚、吞拿魚、劍魚腩、帶子、甜蝦、赤蝦、油甘魚、希靈魚同埋玉子，差唔多所有款式都畀我哋叫晒喇！XD

前菜：

帶子裙邊(左)、中華沙律(右)

壽司：

花之戀(左)、蔥花吞拿魚腩海膽(右)

創作款式：大(左)，即係有蝦、魚肉、三文魚籽加埋魚籽醬嘅壽司；帶子壽司(右)

創作款式：町，呢款除咗魚肉外，仲有埋海膽同魚籽醬㗎！

encore多次蔥花吞拿魚腩海膽(左)、魚籽醬拌赤蝦(右)

卷物：

軟殼蟹卷、青瓜鰻魚反卷、芝士辣味三文魚卷、香芒鵝肝卷、和牛卷(由左至右)

手卷：

海膽手卷

天婦羅：

虎蝦、番薯、南瓜、青椒仔、冬菇等天婦羅

焗：

味噌焗蠔

芝士焗蟹蓋

帶子北海燒

燒物：

燒菠蘿(左)、塩燒牛舌(右)

塩燒鯖魚

炸物：

芝麻雞翼(前)、榴槤炸彈(後)

啲榴槤漿流梗出嚟喇！勁正！愛吃榴槤嘅朋友必食推介！

一品料理：

松葉蟹鍋

清酒煮蜆

紅酒燴牛舌

鐵板料理：

鐵板牛柳粒

泡菜炒豚肉

怪味雞

創作料理：

水晶香芒大蝦卷(左)、薄切鱲魚拌海膽醬(中)、章紅魚薄切拌柚子酢(右)

再encore多次水晶香芒大蝦卷~

最後當然要上甜品啦！除咗自助區嘅之外，每人仲可以額外order一款甜品。有Dreyer's雪糕批同Mövenpick杯裝雪糕揀，大滿足呀！

走嘅時候8點幾，全場爆滿。冇扼你！仲要係平日喎！@.@

廚房內人才濟濟，呢度都算係我見過最多師傅嘅日本餐廳~

飲品去得快，又係時候補倉喇！

門口位置變得好墟冚，就好似越夜越旺咁呀！

有興趣嘅朋友，睇定有咩啱心水啦！(可按圖放大)

「大井町」一向好評如潮，我哋咁胃食，梗係想去試下啦！果然冇令我哋失望，真係好多款式，而且好好味。唔好以為我哋一次過食到咁多嘢，邊有咁大個胃呀？其實係同朋友試完一次後食過番尋味，再帶晴朗爸爸去食過呀！一試再試咪因為佢哋食材新鮮又多款，而且價錢算係幾抵食囉！佢哋入單會按人數出份量，每款份量少，咁就可以試多幾款啦！不過入座起計兩小時便要離座，可能會唔多夠喉呀！

我好欣賞紅酒燴牛舌，煮得好淋夠晒入味。其次係榴槤炸蛋，未食已經聞到陣味喇！見住啲榴槤漿流出嚟果下好興奮呀！除咗一般壽司，有芒果嘅款式我都特別鍾意，酸酸甜甜嘅味道令人更加開胃。刺身、壽司、手卷以及其他食物質素都唔錯，有機會都想再嚟encore呀！

大井町日式放題 Ooimachi Japanese Buffet
晚市放題：
19:30前離場：
星期一至四 (公眾假期除外) 成人$198，長者$188，小童$138
星期五及公眾假期前夕 成人$198，長者$188，小童$138
星期六、日及公眾假期 成人$218，長者$208，小童$138
其他時段：
星期一至四 (公眾假期除外) 成人$238，長者$188，小童$138
星期五及公眾假期前夕 成人$258，長者$208，小童$138
星期六、日及公眾假期 成人$258，長者$208，小童$138

地址：荃灣眾安街55號大鴻輝(荃灣)中心3樓
電話：2515 2988
facebook: https://www.facebook.com/ooimachijapanesebuffet