【海洋公園全新教育活動】歷險探索系列之「春日歷險」

寓學習於娛樂一向係我哋培育小朋友最常用嘅方式，亦都係將知識傳遞給小朋友最有效嘅方法嚟呀！今次到海洋公園唔淨止玩咁簡單，晴朗參加咗全新推出嘅教育活動 - 歷險探索系列之「春日歷險」。一齊嚟深入探索海洋公園遊人止步嘅幕後地方，睇下佢哋嘅歷程有幾緊張刺激囉！
未出發先興奮！晴朗好期待今次嘅活動，一大清早就到達海洋公園喇！真係未見過正門一個人都冇㗎！證明我哋真係好早啦！XD

負責我哋今日活動嘅係穿著制服嘅「米粉姨姨」，姨姨就好似有一種無形嘅吸力一樣，啲小朋友好自然就吸晒埋去喇！@.@

即將乘搭晴朗好喜歡嘅海洋列車，入去囉！gogogo~~

車程雖短，但小朋友你一言我一語，大家已經變得好投契，仲friend過打band添喇！

繼續向探索隊基地進發！~

米粉姨姨先同大家嚟一啲熱身，然後互相認識一下~

跟住就展開緊張刺激嘅遊戲，每組隊員要鬥快揭開屬於自己組別顏色嘅板塊，限時內揭得最多果組為之勝利。睇下朗朗幾咁落力~ XD

一班探險隊隊員開始四出歷險喇！第一個探索對象係海象，米粉姨姨沿途為大家介紹海象嘅知識同觀察佢哋嘅泳姿，小朋友都睇得好雀躍呀！

之後就去咗睇雪狐，剛巧遇上職員餵梗佢哋食早餐，好好彩！

第一次見雪狐乖乖一個跟一個坐定定，按指令轉圈畀我哋睇。真係大開眼界~

接住落嚟就到雪鴞，小朋友都好踴躍回答問題喎！

可以咁近距離觀察雪鴞都係第一次。勁興奮呀！

仲可以同雪鴞影番張合照添！好開心！cheers~

探險隊要返回探索基地喇！

一連串嘅觀察活動都消耗咗唔少體力，係時候放小息，食番啲乾糧補充一下能量。晴朗已經同米粉姨姨玩到熟晒，仲圍住佢兜圈，搞到姨姨頭都暈埋添！^^'''

休息時間都要繼續玩，米粉姨姨同小朋友玩狐狸小姐幾多點，不過轉個方式問佢哋頭先睇咗啲咩動物，一轉過身就會見到佢哋扮果種動物。扮企鵝、扮海象，場面好搞笑呀！ XD

每個隊員獲發一個袋，用嚟裝玩遊戲嘅錢幣嘅！

仲有一本探險記錄冊添！隊員如果能夠展現相關技能同特質，就可以獲得唔同級別嘅星星獎㗎喇！

隊員接過記錄冊，馬上寫上自己名字。著制服呢位係「咩咩姐姐」，佢將會安排不同難度嘅挑戰畀各隊員㗎！

晴朗已經急不及待從錢包攞啲幣出嚟玩遊戲喇！

挑戰一：限時鬥快搵出指定嘅物件同數量，好緊張呀！

晴晴好開心攞到2星獎。繼續加油！

冇晒錢幣？唔緊要！只要做到指定動作，又可以獲取更多錢幣喇！

挑戰二：限時將波拋入海象口內，拋到5個或以上就可以攞到3星獎~

小朋友務求攞多啲星星，都玩得好認真投入。一於全力以赴，做到最好啦！

挑戰三：限時用鉗子將紙箱內嘅魚夾出來，紙箱內機關重重，想攞到3星獎唔係咁易㗎！要畀啲耐性慢慢夾先得~

挑戰四：按圖做出不同嘅動作

既可考身體協調性，又玩得開心，好好玩！^o^

上午嘅挑戰告一段落，由於各隊員都全力應付不同挑戰，所以每人都獲頒徽章以示獎勵~

得到好多星星獎同徽章，滿足感爆燈呀！

午餐時間又嚟到我哋熟悉嘅冰極餐廳，今次試多咗好多款食物！好好味！好滿足！

食飽飽，我哋已經充滿力量喇！

乘搭海洋列車，向海洋奇觀進發~

唔見咩咩姐姐一陣，就好似久別重逢咁，朗朗情緒顯得好高漲！XD

以下落嚟應該係小朋友最期待嘅環節 - 預備特製魚啫喱餵飼海洋奇觀啲魚魚。職員預先用海藻同魚碎撈埋，加熱水之後就會凝固成一塊塊枱上啡色嘅啫喱㗎喇！

首先要準備一個形狀模~

然後就將模吸落去啫喱度~

晴晴整嘅係長耳朵兔仔啫喱呀！

脫模後就完成！

由小朋友製作嘅形狀啫喱好可愛，可以拎去餵魚lu~

小隊員一個跟一個餵魚魚，熱切期待嘅一刻來喇！

畢起自己親手整嘅愛心啫喱先！

晴晴嘅笑容足以話畀大家知佢係幾咁期待啦！

將啫喱掉出，雖然只係一刹那嘅光陰，但已經係一個好深刻嘅體驗嚟喇！

嘩！吸引咗好多魚游埋嚟搶食呀！

米粉姨姨帶隊繼續向各隊員介紹海洋知識，大家都好專心聆聽，仲不時發問一啲「十萬個為什麼」嘅問題。小朋友真係好可愛呢！

去到另一個探索隊基地，又要做啲運動熱熱身，要預備好強壯體魄去接受下午嘅挑戰呀！

當然仲要預備好充足嘅錢幣啦！

挑戰五：限時釣魚，如果釣到7條或以上就可以攞到3星獎~

晴朗都好進取，密密釣呀！

朗朗釣咗6條，攞到2星獎都好叻啦！繼續加油！

晴晴釣咗5條已經好滿足，睇佢幾開心？^o^

又到領取錢幣嘅時間喇！大家為咗賺錢都好落力做出指定動作喎！XD

挑戰六：先從袋裡抽出一件物品，然後從紙箱內找出相同嘅物品，又係限時㗎！Ready? Go~

晴晴3秒就已經搵到相同物件。勁呀！可以獲得3星獎~

第一時間要報告攞滿分，勁開心！

挑戰七：在指定時間內穿越機關重重嘅障礙通道，晴朗響呢個環節都攞到3星獎。食飽咗真係唔同啲喎！^^

挑戰八：限時圈出指定數量嘅物件，睇到眼都花，但小隊員仍然好有毅力，挑戰至最後~

所有挑戰經已完成！米粉姨姨同咩咩姐姐召集各隊員，進行嘉許同埋頒徽章喇！

畀人讚就梗開心啦！仲可以獲得專屬於自己技能嘅精美徽章。小朋友得到好大鼓勵，要繼續努力發展自己嘅個人特質呀！

「星學動物探索隊」任務完成，真係好感謝全程悉心照顧嘅米粉姨姨同咩咩姐姐呀！

晴朗咁努力完成任務，當然要獎勵一下啦！就去佢哋至愛嘅威威天地盡情地玩吧！

快樂嘅時間過得特別快，又係時間講拜拜！節目實在太精彩豐富，雖然玩得好攰，但好開心呀！今晚一定好好瞓~ ^^'''

真係令我哋大開眼界呀！不但可以深入少為人知嘅職員專區，仲通過咗好多條秘道去到不同場館添！可以近距離同唔同嘅動物會面，實在太令人興奮喇！職員專區內都好注重清潔，製作魚啫喱同餵飼前後都需要洗乾淨雙手，就連腳都需要踏過一個小盤以消毒鞋底，可見海洋公園對衞生要求好嚴謹。好欣賞職員全程對小朋友嘅悉心照顧，仲會細心觀察每位隊員，響最後嘉許徽章嘅環節講番晒各隊員嘅特質出嚟！好佩服！換轉係我，肯定連小朋友啲名都記唔到呀！

晴晴最喜歡嘅係餵魚魚環節，而朗朗最開心係頒發徽章時刻。從小挑戰中，可以訓練小朋友嘅身體協調、創意同解難能力。課程後，不但增強咗小朋友嘅自信心、溝通能力同人際關係，仲認識多咗動物同埋環境保育嘅知識添！

「歷險探索系列」同過往海洋公園所舉辦嘅活動好唔同，以「經驗學習法」及「自然遊樂」兩大教育理念為基礎。接觸大自然有助提升小朋友嘅學習動機，而通過實踐活動仲可以更有效鼓勵小朋友透過主動觀察、發現及反思中學習添！課程簡直係將小朋友同大自然連結埋一齊呀！精彩豐富又不設規限嘅「開放式活動」，相信一定能夠提升小朋友嘅自信心及解難能力。

我哋參加嘅係「星學探索隊」濃縮版本，正式活動將會分三天進行，家長無須陪伴上課。由於係期間限定，只會在四月開辦。最後一天嘅畢業禮將會邀請家長出席，一同分享小朋友嘅學習成果。

「春日歷險」共有兩個唔同程度嘅課程，我哋呢個係主要為四至五歲幼童而設嘅「星學探索隊」。大啲嘅可以參加以六至八歲為目標嘅「童遊動物探索隊」。再大啲更可選擇專為八至十二歲而設嘅兩日一夜恆常活動「夜遊海洋歷險記」添！聽到兩日一夜已經覺得好刺激喇！所有活動已經開始接受報名，大家都快啲幫小朋友登記，把握與大自然接觸嘅好機會啦！