2017年5月2日 星期二

【宜蘭親子遊】蔥仔寮體驗農場

去街市買菜好多時都會搭多兩棵蔥,同菜檔熟嘅話仲可能會搭一大束添!蔥,一向都係啲平價、唔起眼、甚至冇乜人會特別去畀錢買嘅嘢。但響宜蘭嘅三星蔥就十分出名,好多人慕名而來就係為咗一嘗蔥之中嘅極品。一向喜愛食蔥嘅我哋又點會錯過呀?為尋求三星蔥何以特別正嘅真相,一於去農場實地考察一下囉!
宜蘭真係到處都係田,但我哋多數見到嘅係稻米田,而蔥田都係第一次見咋!一樣都排列得整整齊齊,仲長得好高添!


嚟到農場梗係唔只參觀咁簡單啦!洗乾淨對手,預備進行我哋嘅第一個活動,就係DIY蔥油餅喇!又有口福囉!^o^


農場職員正在示範點樣整蔥油餅,仲醒咗啲技巧同秘訣畀我哋添!


DIY嘅地方設備齊全,仲有幅咁靚嘅壁畫。睇完晒整個製作過程之後,就到我哋動手做喇!


首先加少少油響枱面,然後碌平個預先整好咗嘅麵糰,最好碌薄少少~


跟住就可以落蔥喇!蔥田大把蔥,想落幾多就幾多囉!XD


umm...新鮮嘅青蔥特別香!


已經捲好咗第一個,加油呀!有冇好味蔥油餅食就靠你哋喇!XD


四個都捲好晒喇!不過仲未搞掂㗎!


下一個步驟係將佢哋壓平,晴朗爸爸壓一兩下就搞掂!


晴朗手仔細細,當然要壓多幾下啦!不過都好快完成喇!


整好之後,就可以攞去煎,即整即煎,一定好好味!超期待呀!*o*


唔好睇佢煎果陣油淋淋,但煎起咗好乾身㗎!


晴朗爸爸鍾意加啲胡椒鹽,宜蘭人好興加呢種調味料。我哋去夜巿都食過喇!


除咗胡椒鹽,仲有辣豆瓣醬。我怕落辣會搶咗蔥油餅嘅味道,所以只係落咗少量胡椒鹽~


一人拎住一件蔥油餅,行上去呢個地方慢慢嘆。風景好靚呀!


去夜市食過蔥油餅已經覺得好好味,但係點及得上自己親手整嘅呢?新鮮熱辣脆卜卜,仲要用農場特級新鮮嘅蔥,未食過咁好味嘅蔥油餅㗎!*o*


望住咁大片蔥田嘆蔥油餅,絕對係一種享受~


難得有咁好嘅天氣,真係天公造美~


由左至右,180度視野全是蔥田,簡直係大開眼界呀!


嘆完風景同蔥油餅之後,接住要進行第二個活動,就係摘蔥體驗喇!


職員教梗我哋摘蔥嘅技巧,大家都好留心聽呀!


呢塊就係蔥田喇!啲蔥長得好高好粗壯,果然係蔥之極品!


落田喇!落田喇!準備好未呀?


嘩!搖身一變!晴晴已經戴上斗笠,穿上水靴,變身成為小農夫喇!哈哈!XD


計我話摘蔥之前,首先要學識在田上行,原來踩落泥漿果陣,對腳會畀啲泥啜住㗎!朗朗覺得好神奇,不停笑,而且仲好鍾意搵啲泥路嚟行添!XD


另一邊霜,晴晴已經開始學習摘蔥,原來摘蔥都好有技巧。用慣用果隻手反手(虎口向下),一手揸住蔥白部份,然後左右搖鬆佢,再垂直將蔥摘出嚟!真係要體驗過先知咁講究。咦!晴晴冇反手嘅?再重覆練習啦!


晴朗都摘咗好多!大豐收!好滿足呀!


摘好啲蔥番嚟!要攞去洗蔥池度洗。而洗蔥池啲水係流動而且乾淨嘅活水,除咗用嚟清洗蔥之外,仲可以降低蔥嘅體溫,有保持蔥嘅翠綠之用㗎!


由於三星地區成日落雨,而且日夜溫差大,令蔥生長速度慢,所以三星蔥除咗蔥白比較長之外,更重要嘅就係葉肉厚、纖維少、口感細,所以咪特別好味囉!


臨走去洗手間嘅時候見到呢幅畫,好可愛,農場都花咗唔少心思響裝修方面喎!

從前只係識食嘅之嘛!DIY蔥油餅原來唔難整,簡單得嚟又好味,真係想食多幾件呀!超好味嘅原因背後,當然係三星蔥嘅功勞啦!三星蔥主要靠太平山嘅山泉水同埋早晨嘅露水滋養種植而成,我講梗嘅唔係香港果個太平山喎!係宜蘭果個。在天時地利互相配合嘅環境下生長,絕對係冇得輸!初時仲以為落田會身水身汗,但原來冇想像中咁辛苦。不過畀啲泥啜住對腳真係好難行㗎!摘蔥、洗蔥、DIY三星蔥油餅,好充實豐富嘅體驗!大家如果去宜蘭玩,一定要去感受下三星農村嘅農夫生活呀!


葱仔寮體驗農場
地址:宜蘭縣三星鄉天福村東興路13號之2
電話:0937-995104
網址:http://0937995104.tranews.com
facebook: https://www.facebook.com/蔥仔寮體驗農場-227085000689804


FIND US on:
     

BLOGs:

CONTACT US:

沒有留言:

張貼留言