2017年5月18日 星期四

【精彩難忘】台灣.宜蘭親子遊

仲記得6年前,朗朗9個月大嘅時候,一家人到過澳門玩,果次印象好深刻。行裝除咗帶備bb食物、尿片同衫仔之外,仲帶埋bb浴盆、飯壼同幾樽大支裝嘅食水。新手父母係驚青啲,擔心bb水肚不服丫嘛!眼見晴朗爸爸揹一袋,拎兩大袋,大包小包再加個大喼,仲慘過去打仗呀!自此,我哋決定如果去國外旅行,一定要等小朋友有多啲自理能力先再諗。機會終於嚟喇!既然係第一次出國,就揀個近近哋嘅地方啦!上網做過一啲功課,台灣宜蘭原來好多嘢啱小朋友玩,所以宜蘭就成為咗我哋嘅目的地喇!
第一次一家人出國,嚟到機場,心情真係勁興奮!


晴朗第一次排隊辦理登機手續,嚟梗仲會有好多嘅第一次呀!


嘆完個靚早餐之後,就離境喇!行去登機位置途中實在太多誘惑、太多吸引~ XD


終於去到30號候機位置,興奮嘅心情一刻都冇停止過~


到底飛機上係點嘅呢?有咩嘢食?有咩風景睇?


十萬個為什麼又來喇!好快就可以一一解開啦!


等待期間,見有個港式奶茶佈景,幾有風味!


出出入入,扮侍應、扮沖奶茶,又可以玩一大餐~ XD


上機喇!晴朗都可以坐窗口位,好開心!仲各自搵到機上嘅娛樂添!


「原來從高空望落去,汀九橋變得咁細,就好似模型咁呀!」


「嘩!我哋同啲雲好近,好想當棉花糖咁食晒佢~」

對於第一次坐飛機嘅小朋友嚟講,又真係幾新奇有趣嘅!^^


飛機上嘅午餐係雞柳炒麵,機程太短,要快啲食喇!


到達台灣上空,天氣好好呀!


一落機第一件事就係要搵地方唱錢,桃源機場都幾大幾舒適喎!


搵到喇!個rate係3.754。我哋用HK$13500唱咗NT$50649,係咪覺得賺咗咁呢?XD


跟住就要買電話咭啦!響咁資訊發達嘅年代,上唔到網會死人㗎!


職員推介我哋用3 Day Pass已經足夠4日3夜嘅旅程,誠惠每張NT$300 (HK$80)


晴朗第一次見啲行李響輸送帶度轉出嚟!好有趣!有件行李仲要追住咁攞!覺得好刺激!但其實等佢轉多個圈咪唔駛追囉!^^'''


大個啲先出國有好多好處,可以幫手攞行李就係其中一個喇!


同包車司機會合後,就向宜蘭出發囉!gogogo~

大約90分鐘車程,就到達我哋嘅第一個景點~

幾米公園
雖然我哋冇咩接觸過幾米嘅繪本,但一向都好欣賞佢嘅畫作。踏進幾米公園,步伐自然放慢,感覺好悠閒自在!從想像走進現實,就好似置身於幾米嘅繪本世界咁呀!(詳細內容請即按以下相片)

遊完公園,到民宿放低行李,稍稍休息,又出發去第二個景點喇!

羅東觀光夜巿
去台灣,「夜巿」幾乎係必到景點。來到宜蘭,當然唔會錯過羅東夜市啦!夜市越夜越多人,仲熱鬧過香港嘅旺角呀!食完一檔又一檔,每一味都食出驚喜!好鍾意呢度嘅美食同氣氛,真係一個掃街、shopping同玩樂嘅好地方呀!(詳細內容請即按以下相片)

途經便利店,好自然會貢入去睇下啦!


宜蘭嘅便利店有座位畀客人坐住食,又幾好喎!仲畀我發現有大愛嘅燒蕃薯賣添!同香港嘅便利店好唔同~

食飽、玩飽,係時候番去民宿休息。香港人特別多心又愛試新嘢!我哋響有限嘅時間內入住咗3間唔同風格嘅民宿。逐一同大家介紹下啦!

羅東小築
出外旅行,幾乎每一次都係住酒店。今次一於改改一貫作風,入住民宿,體驗一下當地人文風情。呢度為我哋充實緊密嘅行程中,帶來輕鬆悠閒嘅時光。雖然冇華麗嘅裝修,亦都冇昂貴嘅傢俬,但有嘅係最真、最親切嘅服務。(詳細內容請即按以下相片)

~~~ 第 二 天 ~~~


宜蘭嘅早晨好靚呀!


響咁美好嘅環境之下,嘆番個醒神早餐先~


食飽飽又玩過,之後又出發去新景點喇!

蜡藝彩繪館
每個小朋友都一定用過顏色筆啦!但係你又知唔知道蠟筆或者水筆係點樣製造㗎呢?呢度好玩又學到嘢,仲要咁平添!晴朗都樂在其中呀!(詳細內容請即按以下相片)

玩飽又輪到去搵食喇!今次我哋唔去餐廳,去一個地方自己整,自己食!^o^

蘇澳港邊社區窯烤披薩
響香港想食pizza,多數都會去有連鎖店果幾間較大型嘅pizza店。貪佢哋款式多,總有一款啱晒我哋一家人嘅口味。但呢間不但冇連鎖店,只此一家,而且款式唔多,反而咁樣更加吸引人來幫襯。自己整+新鮮出爐嘅pizza,簡直係天下無敵呀!(詳細內容請即按以下相片)

食飽總會心痕痕,想嘆番啲甜品。冇付出又點會有收穫呀?又去DIY囉!

羅東鎮農會養生文化觀光工廠
「農會」係台灣特有嘅農民組織,主要負責製造及發售當地出產嘅農產品。呢度有好多宜蘭出產嘅健康食品,真係想一次過帶晒番香港呀!DIY體驗又係好好玩!食皮蛋、飲豆奶、DIY、購物樂,又一個充實嘅活動!(詳細內容請即按以下相片)

去民宿放低行李,又出發去食同玩囉!~

A‧maze兔子迷宮咖啡餐廳
每次去旅行都好鍾意安排一啲觀景嘅景點落行程度,欣賞景色之餘,又可以回味一下旅遊點滴。呢間主打睇風景嘅餐廳可以睇晒成個蘭陽平原嘅景色,無論日景定夜景都一樣咁靚!睇過先發現宜蘭嘅夜景原來係咁靚㗎!響呢度,大人可以邊賞景,邊嘆美食。小朋友就可以到草地、遊樂場同迷宮大放電呀!(詳細內容請即按以下相片)

食飽玩飽,又係番民宿嘅時間喇!不過其實番到民宿都仲有好多嘢玩。唔信?跟住嚟啦!

藝景居 & Royal House
對於去旅行住慣酒店嘅朋友嚟講,可能會擔心唔知住唔住得慣民宿。但其實OK㗎!因為民宿都可以有酒店級水準。在感受當地人生活文化之餘,亦享受到高水準嘅住宿呀!(詳細內容請即按以下相片)

~~~ 第 三 天 ~~~

又過咗寧靜嘅一個晚上,好舒服~


早上嘅太陽好溫暖喔~


食過民宿嘅精美早餐後,又繼續玩囉!


盪韆鞦,你高啲定我高啲?


不如到沙池玩番轉啦!用沙堆砌出不同形狀好好玩呀!

玩到差不多時候,又要開展新一天嘅旅程喇!

蔥仔寮體驗農場
宜蘭嘅三星蔥十分出名,好多人慕名而來就係為咗一嘗蔥之中嘅極品。摘蔥、洗蔥、整蔥油餅,可以體驗一下三星農村嘅農夫生活,好好玩!終於解開宜蘭三星蔥特別好吃之謎喇!(詳細內容請即按以下相片)

辛勞咗半天,好想嘆冷氣呀!不如去Mall行下囉!


新月廣場好大,貨品應有盡有,旅途上發現有咩唔夠都可以嚟呢度補充㗎!


最吸引晴朗嘅,當然係玩具店啦!


其實睇下都已經好滿足㗎喇!XD


經過誠品,不如入書店扮下文化人囉!


直入兒童部,各式各樣嘅書藉都有齊,晴朗當然又有收穫啦!^^'''

行到夠鐘,要去醫下個五臟廟喇!

今次去酒店嘅中菜廳食大餐,好期待傳聞中勁好味嘅櫻桃鴨呀!

紅樓
剛去完宜蘭嘅朋友極力推介我試紅樓嘅櫻桃鴨,話唔試一定會後悔喎!既然講到咁,我哋又點可以為自己製造遺憾呢?紅樓嘅櫻桃鴨果然名不虛傳!好味之餘,份量仲十足!真係食到要抱住個肚腩走呀!(詳細內容請即按以下相片)

食飽又出發去玩DIY,今次係小朋友至愛嘅糖果呀!

菓風糖菓工房
食甜嘢,好多人都鍾意,尤其係小朋友啦!想搵台灣出名嘅糖果品牌,菓風小舖一定在名單之上。佢哋啲產品包裝精緻,又有創意,味道仲好有驚喜添!都幾多分店,有幾間有埋DIY工房。我哋就去咗其中一間整棒棒糖,好好玩又好味!仲掃咗勁多貨帶番香港做手信添!(詳細內容請即按以下相片)

掃完一大輪貨之後,去民宿放低行李~

稍作休息,向別具特色嘅餐廳進發~

壯圍穀倉風味料理餐廳
原本用嚟為農民儲存稻穀米糧嘅地方,改建後,變成咗一間農村風味濃厚嘅餐廳。走進此地,就好似番咗去以前嘅農村咁,無論食物、環境以至裝修佈置都好有懷舊風味。呢度仲有DIY麥芽糖餅乾同彈珠機玩添!(詳細內容請即按以下相片)

食到飽一飽,又一次抱着肚子走~

民宿真係畀到我哋好有「家」的感覺呀!

宜人生活
呢間民宿無論係日常生活設備,或者係兒童玩樂設施都悉心為小朋友而設。貼心又窩心!今次嘅住宿體驗好難忘呀!(詳細內容請即按以下相片)

~~~ 第 四 天 ~~~

嚟到最後一天,開始唔捨得宜蘭喇!嗚嗚~


美好嘅早上,到處都係山景田景,感覺真係好舒服~


吃了一頓十分有人情味嘅早餐,大滿足!


電動車時間!呠~ 呠~~


晴晴臨走仲要瀡多幾轉滑梯,呢個就係親子民宿嘅魅力喇!

最後一天嘅行程,繼續會去玩DIY。宜蘭真係好多DIY好地方呀!

宜蘭餅發明館
難得去到宜蘭,梗係要試下DIY當地有名嘅牛舌餅啦!箇中樂趣好難以筆墨形容,簡單啲講,係一次好笑又好味嘅體驗呀!(詳細內容請即按以下相片)

小朋友盡情DIY,大朋友瘋狂shopping過後,要去補充一下能量。又去餐廳拆大餐喇喂!

窯烤山寨村
據聞呢間餐廳有好多「妖魔鬼怪」!做好心理準備未?自認大膽嘅你,夠唔夠膽入去睇下先?(詳細內容請即按以下相片)

一連4天嘅行程嚟到呢度,已經去到尾聲喇!天公造美,不但有好天氣,活動亦能夠順利進行,好感恩!當中最功不可沒嘅就係包車司機 - 「黃叔叔」喇!


感謝黃叔叔揸車帶我哋去晒所有想去嘅地方,仲幫手代訂所有DIY體驗和餐廳booking,真係幫我慳番唔少功夫~


旅途上,黃叔叔除咗為我哋做導遊,仲兼埋保母一職,同晴朗玩埋一堆,就好似一家人咁呀!XD

仲有,由於要用普通話溝通嘅關係,旅程完結嘅時候,我發覺我有限嘅國語水平上升咗唔少~

大家如果去台灣想搵包車司機,我極力推介呢位富責任心又有愛心嘅司機:
維享受·宜蘭輕旅行包車旅遊
https://www.facebook.com/Wei1025

前往台北嘅車程上,晴朗都瞓到成隻豬咁,大概係過度放電嘅關係啦!不過車程差不多兩小時,十分之長途。其實路程唔係真係咁遠,但撞正假期後特別多車行呢條路,所以大家都要留意預多一啲時間番機場呀!


等待上機返港,晴朗在車上叉足電梗係精神充沛啦!


又可以搭飛機,心情再一次興奮起來~


朗朗繼續睇埋去程未睇完嘅卡通片,邊看邊食,幾識嘆?


台灣.宜蘭,拜拜!希望不久嘅將來可以再見啦!


呢隻係黃叔叔親手用飲管整嘅蝦,好特別!每次望到佢,就好掛住宜蘭喇!


去旅行洗錢特別會豪一啲,睇下我哋買嘢收集咗幾多單據?每張都差唔多款式,整整齊齊,我覺得好有收藏價值呀!XD

台灣.宜蘭係一個寧靜、悠閒,令人放慢腳步嘅地方。當地人生活好簡單,今天的工作做不完,明天再做吧!亦都冇咩夜生活,想夜嘅話可能去下夜巿,掃下街咁!但夜巿都收好早,唔過十二點,與香港繁忙同多姿多采嘅生活截然不同。

 

宜蘭地方好大好大,但只得45萬人口,屋與屋之間有一大段距離,感覺就特別開揚舒適喇!途經過一間自助洗衣店,好有日本feel。原來宜蘭以前受著日本人統治過嘅影響之下,無論生活文化、風土人情都帶著日本風味,就好似去咗日本嘅沖繩咁呀!周圍都好整齊清潔,唔會好似香港咁到處都可見垃圾。最搞笑嘅係每一日垃圾車都會經過不同民居,居民到時到候就會去指定位置等垃圾車到,然後掉垃圾,如果垃圾車過咗就掉唔到垃圾㗎喇!見到聚集咗一班居民拎住垃圾等候嘅情景,看似好好笑,但其實好欣賞佢哋呢種細心、自律、有耐性及責任心嘅文化,好值得我哋去學習呀!

 

香港人嘅步伐一向都比較急速,我初時都帶埋呢啲急步過去。但黃叔叔經常提我唔駛急,旅遊就應該慢慢感受。又係喎!漸漸地,我嘅腳步都開始放慢,去慢慢細味宜蘭嘅每一個角落喇!

 

宜蘭嘅人無論係街邊檔嬸嬸、民宿屋主、DIY導師、商場售貨員以至包車司機,每一個都好友善同親切。我覺得宜蘭最美係細心嘅人!食物每碟都係藝術品,好回味!全個行程要講最難食嘅,都算係飛機餐喇!晴朗響親子民宿同埋不同嘅DIY體驗亦都搵到好多樂趣。對於第一次一家人出國嘅經驗嚟講,算係幾順利開心!最難得嘅係有好天氣,真係天天都是晴朗天呀!

 

最後,畀一啲資料大家,等有興趣去玩嘅朋友都可以參考下啦!

宜蘭親子遊4日3夜行程:

第一天 (星期六)
11:05 機程至台灣
14:55 到達台灣桃園機場 (由於班機delay咗,原本應該12:55到達㗎!所以要取消去積木博物館嘅行程)
15:15 與包車司機接洽並前往宜蘭
17:00 幾米公園 (臨時加插的景點)【a】
19:00 到羅東小築放低行李及稍作休息【b】
20:00 晚餐於羅東觀光夜市【c】
22:30 返回民宿梳洗休息

第二天 (星期日)
08:00 早餐於民宿
10:00 到蜡藝彩繪館DIY蠟筆【d】
12:30 午餐於蘇澳港邊社區窯烤披薩DIY Pizza【e】
15:00 到羅東鎮農會養生文化觀光工廠DIY豆腐花【f】
18:00 到藝景居 & Royal House放低行李及稍作休息【g】
19:30 晚餐於A‧maze兔子迷宮咖啡餐廳【h】
21:30 返回民宿梳洗休息

第三天 (星期一)
08:00 早餐於民宿
10:30 到蔥仔寮體驗農場DIY蔥油餅【i】
13:30 午餐於紅樓【j】
16:30 到菓風糖菓工房DIY棒棒糖【k】
18:00 到宜人生活放低行李及稍作休息【l】
19:30 晚餐於壯圍穀倉風味料理餐廳【m】
22:00 返回民宿梳洗休息

第四天 (星期二)
08:00 早餐於民宿
10:00 到宜蘭餅發明館DIY牛舌餅【n】
13:00 午餐於窯烤山寨村【o】
16:00 到達台灣桃園機場
16:55 機程返回香港

*【x】為以下地圖之標籤

景點位置:(可按圖放大)

我們的最愛星級鎊:
晴晴:【住宿】藝景居 & Royal House 【景點】蘇澳港邊社區窯烤披薩
朗朗:【住宿】羅東小築 【景點】宜蘭餅發明館
晴朗媽媽:【住宿】宜人生活 【景點】蔥仔寮體驗農場
晴朗爸爸:【住宿】藝景居 & Royal House 【景點】蜡藝彩繪館

宜蘭親子遊4日3夜洗費 (HK$):
旅遊保險x4 $360 (可參考:Money Hero)
台灣電話咭x2 $160
於羅東觀光夜巿掃街 $223
蜡藝彩繪館DIY及購物 $235
蘇澳港邊社區窯烤披薩DIY $165
羅東鎮農會養生文化觀光工廠DIY及購物 $241
於兔子迷宮晚餐 $571
蔥仔寮體驗農場DIY $160
於新月廣場購物 $562
於紅樓午餐 $1232
菓風糖菓工房DIY及購物 $893
於壯圍穀倉風味料理餐廳晚餐 $560
宜蘭餅發明館DIY $229
於窯烤山寨村午餐 $298
機票x4 $6676 (可參考:Skyscanner)
台灣包車 $3942
羅東小築民宿 $1545
藝景居 & Royal House民宿 $1385
宜人生活民宿 $1492
TOTAL: $20,929.00

更多景點推介:
我哋編排嘅行程大部份都順利完成,只係因為飛機delay趕唔切去積木博物館,同埋原本安排最後一天早上會到南方澳觀景台睇晒全個宜蘭風景,但因為行程上比較趕而取消,有啲遺憾!仲有一啲景點都好適合親子去玩,好似橘之鄉可以DIY金棗蜜餞;宜農牧場可以餵飼小動物、擠羊奶、DIY手工皂及彩繪;到梅花湖蘭陽博物館參觀等等。大家都可按個人喜好,編排入自己嘅行程裡面。祝大家都好似我哋咁,可以有一個精彩難忘嘅宜蘭旅程呀!

精華片段:


FIND US on:
     

BLOGs:

CONTACT US:

沒有留言:

張貼留言