2017年5月8日 星期一

【宜蘭親子遊】壯圍穀倉風味料理餐廳

宜蘭係一個農產業非常豐富嘅地方,產量咁多,自然需要大量倉庫啦!「壯圍穀倉」嘅所在位置以前就係用嚟為農民儲存稻穀米糧㗎喇!改建後,變成咗一間農村風味濃厚嘅餐廳。一於去穀倉食番餐,感受下宜蘭人以前嘅農村生活囉!
一諗起農田會聯想到咩嘢呢?冇錯!就係稻草人!餐廳門外已經有一個喇!


呢個係「壯仔」,真係好強壯喎!有老鼠仔㗎!


踏入餐廳,懷舊風味十分濃厚。我唔知道以前嘅穀倉係點嘅樣,但就好鍾意呢份傳統味道呀!


小圓枱上,已預先擺放好碗同餐具。用布包得好靚仔果包咪就係餐具囉!包到成個日式便當咁呀!


打開畀大家睇下啦!杯、碟、碗同筷子排放得整整齊齊,乾淨企理~


原來碗底有壯仔個樣㗎!好特別呀!

點完菜之後,同晴朗出去周圍參觀下先~


古舊嘅村屋、紅磚牆上放滿農具、門上嘅對聯,所有嘢都好有農村風味。就好似番咗去以前嘅農莊一樣呀!


一二三跳飛機,相信大家小時候都玩過啦!但新一代嘅小朋友未必接觸過,趁機會教下佢哋玩先~


唔該借借!我哋要幫手運送穀物呀!XD 兩個小農夫係咪似模似樣呢?


呢部風穀車係以風力去除穀糠或雜物嘅清理器具嚟㗎!


玩具部一定最啱小朋友啦!晴朗又有好多新發現喇!~


多款兒時嘅傳統玩意,啲童年回憶又番番晒嚟~


除咗玩具,亦有售賣餐廳自家製嘅割稻醬。據聞用咗呢種醬料,就可以在家自己DIY割稻飯㗎喇!


仲有麥芽糖,大家細個有冇整過麥芽餅乾呢?

其他貨品都好特別㗎!


精油手工皂


洗面小絲瓜


去角質火山石

呢啲都係農家用品嚟呀!


繼續吸引住晴朗嘅唔係食就係玩㗎啦!


Bingo! 呢度有更多兒時玩意,仲有零食添!


望住呢一啲玩具,我就好似番番去細個咁,童真都番埋嚟喇!XD


晴朗少見,更覺得啲玩具新奇有趣啦!玩玩下仲大戰起來添!^^'''


嘩!啲糖果好經典呀!好似番咗去七八十年代咁,好令人回味!


用葵扇幫兔仔潑涼,睇下兔仔個樣幾咁爽?XD


我哋仲發現咗兩部超懷舊嘅彈珠機,一陣食完飯出嚟慢慢玩先得~ *o*

嚟呢度點菜好方便,因為多數人都會點「割稻餐」。套餐已經包括咗幾道穀倉人氣料理,啱晒多心嘅我哋啦!^^


白米鮮雞湯 - 白米熬出湯再加雞肉,鮮味十足!飲完一碗要再添多碗呀!


糖蔥鴨片 - 煙燻出嚟嘅鴨胸肉質軟熟,脂肪比例都好平均。最特別係旁邊果個雀巢,係用糖拉出嚟㗎!每一片鴨胸都加少少糖絲咁食,好夾!好好味!


清炒曼波魚皮 - 曼波魚係一條冇尾嘅魚,只靠上下兩支鰭擺動,好似翻車嘅感覺,所以又稱翻車魚。魚身六至七成都係魚皮,所以魚皮口感都幾有厚度,而且十分爽滑~


呢條就係曼波魚,個樣係咪好可愛呢?游水嘅泳姿仲得意呀!想睇就上youtube search下啦!^^


滷元蹄 - 滷水汁調得啱啱好,元蹄亦好淋好入味,啱晒我哋口味呀!


三寶豆腐 - 用雞蛋、皮蛋、鴨蛋炒起嘅豆腐特別香滑好味!送飯一流!


XO醬炒蕃薯葉 - 蕃薯葉鮮嫩翠綠,加上用元貝蝦米XO醬炒出嚟就特別香喇!唔講唔知,原來番薯葉有抗氧化、提高抗病力、延緩衰老、抗炎防癌等多種保健作用,食多啲都對健康好啲呀!


割稻飯 - 呢味係早期媽媽嘅拿手菜。umm...大量三星蔥,蔥香陣陣撲鼻!加上用醬油、豬油煮成嘅飯,點會唔香味四溢丫?


最後,送上嘅係冰糖葫蘆,唔知大家有冇食過呢?我一向都唔鍾意食呢樣嘢!但呢度整嘅同一般好唔同~


內裡紅色嘅係車厘茄,咁樣整法又幾好味喎!


惠顧割稻餐送麥芽糖DIY,晴朗開始整喇!


首先用木棒沾一啲麥芽糖,多少隨你喜歡~


跟住就用兩塊餅乾夾住木棒,變成麥芽糖夾心餅~


晴晴覺得好好玩呀!不過啲麥芽糖好似漏梗出嚟!快啲食啦!~


食飽當然繼續玩過啦!傳統彈珠機原來係要用木板嚟推啲珠上去㗎!呢種玩法舊到連我都未見過,何況係晴朗呢?hahaa~


玩完仲有得揀禮物,做小朋友真開心!


又玩又有禮物收,發達囉!兩個都四萬咁嘅口~ XD


臨走仲要買番啲傳統玩意添!晴晴似乎好滿意呢個萬花筒喎!


至於朗朗就買咗樽波子,果然係男孩子鍾意嘅玩意呀!

我哋成日都四出搵食㗎啦!但係食到去穀倉都係第一次。懷舊嘅裝修,加上農家用品同農具嘅配搭,就好似去咗以前嘅農裝探親一樣,好有「家」的感覺,好溫馨!割稻餐每道餸菜都好好味,粗茶淡飯得嚟又煮得好出色!真係食得番以前農村嘅風味㗎!晴晴鍾意DIY麥芽糖餅乾,而朗朗就鍾意玩彈珠機。嚟到呢度,小朋友玩得開心,大人亦可以重拾童年回憶。真係一個好有特色嘅親子好地方呀!


壯圍穀倉風味料理餐廳
地址:宜蘭縣壯圍鄉吉祥村壯五路143號
電話:03-9383186
網址:http://barn.com.tw
facebook: https://www.facebook.com/granary.juanwei


FIND US on:
     

BLOGs:

CONTACT US:

沒有留言:

張貼留言