2017年5月31日 星期三

【食玩買】Comic Park & Cafe 動漫樂園及主題餐廳

九龍灣MegaBox除咗多店舖售賣小朋友嘅嘢之外,仲有地方畀小朋友放電,所以一向都大受家庭歡迎。咁啱同班媽媽去開九龍灣玩,好自然就想去MegaBox開餐啦!我哋去咗一間有得食、有得玩又有得買嘢嘅餐廳,玩得好開心呀!
去到門口已經見到人頭湧湧,好熱鬧!餐廳都幾多捧場客喎!


晴晴仲記得細細個騎過Rody,不過呢隻大好多呀!


話明係動漫餐廳,想像中應該會有好多唔同嘅動漫元素。餐廳牆上可見鐵甲萬能俠、Rody、咸旦超人....


仲有可愛嘅柴犬添!色彩繽紛!就好似置身響動漫世界之中咁呀!

餐廳有圓枱、方枱,亦有梳化位,環境寬敞舒適~


睇完戲嚟tea一tea,心情特別hea。有咩嘢好食呀?


聽講呢度最出名嘅係pizza,一於叫下午茶B、C餐啦!(可按圖放大)


先嚟嘅係飲品,大家似乎都好愛熱檸水喎!~


我哋就鍾意凍飲,解下渴先啦!


就連飲品支攪攪棒都係咸蛋超人,好特別!飲都飲得開心啲呀!


夏威夷pizza - 新鮮出爐熱辣辣,唔只芝味濃郁,pizza底亦好香脆,果然名不虛傳喎!


炸雞髀配什果薯仔沙律 - 平時真係好少食呢啲高卡路里食物,但難得出嚟玩就放縱下啦!XD 新鮮炸起外脆內軟,晴朗食到lam lam脷呀!切晒啲肉畀佢哋,剩番啲頭頭尾尾畀我食,真係有衝動想叫多碟~^^'''

兩款食物都整得唔錯!睇埋朋友叫果啲先~


焗法蘭克福腸肉醬意粉


鮮果朱古力雪糕配梳乎厘

睇個樣都已經好吸引啦!要進行偷食行動先得!XD


嚟嚟嚟!我哋唔客氣喇!


晴朗知道食完就有得玩,不停大啖大啖咁食,仲互相幫助添!玩對於小朋友嚟講真係好重要呀!

食飽之後,梗係9秒9衝過去遊戲區玩啦!


嘩!咁多部遊戲機,玩邊部先好?


不如玩我哋最熟悉嘅推寶石機先啦!推咗好多出嚟!但其實屋企已經有好多喇!^^'''


你拋我又拋,考下邊個眼界準啲先~


青娃個口「mark」到咁大肯定好肚餓啦!XD


射水槍,睇下邊個射得高分先~


呠呠~~ 讓開讓開!我哋趕住去救火呀!


呢部射球機好難玩,就係咁先有挑戰性丫嘛!(但係啲代幣都去得快啲)


做下運動啦!未夠高玩真正嘅籃球,玩下呢啲都幾好喎!


碰碰運氣掉下彩虹先~


呢度啲獎品都唔嘢少㗎!款款都係有質素嘅動漫禮品。不過可惜我哋運氣唔多夠,掉晒啲代幣都要停喇!


玩晒代幣唔等於冇嘢玩嘅!齊齊玩番轉rody囉!個個都彈彈下,好搞笑呀!

玩完一大輪,臨走不忘行下精品店~


店內有各種各樣動漫卡通人物嘅文具、公仔同精品~


有梳乎蛋、Rody、超人、迪士尼系列等等,有啲仲要係期間限定,真係手快有手慢就冇喇!


晴晴決定帶rody番屋企,朗朗就似乎仲未揀定喎!選擇困難症又發作,冇計,似媽媽嘛!XD

嚟到MegaBox最初只係想搵間餐廳可以畀我哋坐低食下嘢,吹下水。有媽媽提議去Comic Cafe,果然冇介紹錯喎!食物好味之餘,價錢亦相對其他卡通主題餐廳抵食。而且仲有咁多嘢玩,大人同小朋友都樂在其中,好有驚喜!呢度除咗係小朋友嘅天地,大人亦都搵番唔少童年回憶。食玩買集於一身,我哋玩到好晏都唔捨得走,真係一個親子消閒嘅好地方呀!


Comic Park & Cafe 動漫樂園及主題餐廳
地址:九龍灣宏照道38號MegaBox 9樓23號舖
電話:2458 6032
facebook: https://www.facebook.com/comicparkcafe


FIND US on:
     

BLOGs:

CONTACT US:

沒有留言:

張貼留言