2017年9月1日 星期五

【茶控必試】GUM "JENG!" X 御前上茶

無論拍拖定係相約好友晚飯,食飽咗總會想再搵間食店坐多陣,繼續吹下水。聽人講食飽飯食番啲抹茶嘢會感覺冇咁膩㗎喎!超級抹茶控又四出搵食喇!今次嚟到旺角一間紅極一時嘅「御前上茶」,又係有我心愛嘅抹茶雪糕呀!事不延遲!去試囉試囉!
就咁睇門面裝修,大家會唔會以為係日本料理店嚟呢?啱咗一半啦!其實「御前上茶」係來自台灣嘅日式+西式食品餐廳嚟㗎!


等位期間,望下門外嘅大餐牌,食物都好似幾精緻咁喎!(可按圖放大)


而最吸引我嘅,當然係佢哋嘅抹茶甜品啦!(可按圖放大)


咦!原來佢哋有外賣部㗎!


綠茶雪糕可以配甜麥、紅豆、白玉或蕨餅,好吸引!


大筒$30,細筒$20,如果係我一定叫大筒啦!XD


落完order記得企定定等雪糕,唔好四圍走咗去呀!^^


餐廳內大概有10張枱,除咗望到嘅呢一邊,右手邊都有幾張枱,全場座無虛席。啱啱有人埋單,店員正忙執枱畀我哋入座~


入去嘅時候留意到近門口位置寫住每位最少要叫一款食物或飲品。冇問題啦!我同晴朗爸爸應該唔只叫兩款,勁多心~ XD


霜淇淋配紅豆白玉 - 抹茶味軟雪糕比起一般果啲較為結實,質感厚身豐富,抹茶味濃,好足料!抹茶同紅豆係絕配,呢層無庸置疑。再加兩粒白玉,煙煙韌韌嘅口感,冇得彈呀!


御前抹茶蕨餅 - 用木托盤盛上感覺特別矜貴~


自從試過銅鑼灣京林屋之後,就好鍾意食抹茶蕨餅喇!而呢度嘅抹茶產品絕對可以同京比美~


細小嘅蕨餅,每一件都有濃郁抹茶味。柔軟得嚟又帶點煙韌,邊食雪糕邊嘆蕨餅,兩種唔同質感滿佈味蕾,好滿足呀!


嫌未夠重口味?可以加一啲抹茶醬汁~


正當我哋狂落之際,店員同我哋講應該倒在一旁,慢慢點嚟食。如果唔係,啲汁會同抹茶粉「漿」埋一齊冇咁好。我哋做咗個錯誤示範,唔好學呀!XD


霜淇淋北海道牛奶布丁 - 可能用咗太多時間去影前兩款甜品,開始有啲溶嘅跡像喇!要快啲食先~


本身都好鍾意食牛奶布甸,如果加咗抹茶雪糕又會係點嘅味道呢?


雪糕同出一處,非常幼滑兼濃茶香唔駛再講啦!umm...正!


至於牛奶布甸奶味好重,口感好滑,食食下仲發現原來加咗甜麥,味道似爆谷咁香甜脆口。有驚喜!


喜歡創新嘅我哋,嘗試淋一啲用剩嘅抹茶醬汁落去,牛奶布甸加啲抹茶味原來都唔錯喎!XD


比起京來講,呢度價錢平啲,而且冇收加一服務費,算係幾抵食。最重要係質量唔會輸比京,而且地點更方便嘛!

「御前上茶」帶畀我哋口感豐富嘅一個晚上,絕對滿足到抹茶控嘅慾望!睇見隔離枱食鐵板抹茶鬆餅「渣渣」聲咁上都好吸引,如果唔係晚餐食得太飽,都想試呢款呀!下次encore一定要試試。嚟食之前見過有啲食評彈到一文不值,我又覺得事實唔係咁,食物都好OK,有質素喎!所以幾時都話要親身試過先知龍與鳳,唔試過你永遠唔會知道真與假。不過服務的確只屬一般,尚有進步空間。呢度係抹茶控或日本輕食人仕嘅好去處,下次再嚟想試埋佢哋嘅茶漬飯同埋其他抹茶甜品呀!


FIND US on:
     

BLOGs:

CONTACT US:

沒有留言:

張貼留言