今次一於加碼，實行玩足三日兩夜，滿足度應該大增喇啩？
我哋將會入住兩間感覺完全唔同嘅酒店，行程都會隨著酒店唔同嘅風格而有所不同。
可以話係悠閒寫意同精彩豐富兼並，大人同細路都一樣咁啱玩！
不過今次過澳門除咗玩之外，其實仲有一個目的，就係為澳門打打氣喇！
一向喜愛澳門嘅我哋，見到澳門被颱風吹襲過後陸續恢復，都感到好開心呀！
事不延遲，馬上開展我哋嘅三日兩夜澳門之旅囉！
晨早9:00船過大海，個個都精神奕奕。一落船又例牌攞咗啲擦擦咭，發現而家啲宣傳品越做越精美，成條鎖匙都做到出嚟！唔知係送車定送樓呢？XD
趁住搭shuttle期間，立即換咗響碼頭買嘅電話咭先！$50已經足夠三日用喇！
第一站係「新濠影滙」，十分熟悉嘅氣味！已經嚟過兩次喇！想睇番我哋上兩次嘅旅程可按以下連結：
澳門新濠影滙之旅
http://blog.xuite.net/chinglongtin/blog/426733195
Encore澳門新濠影滙之旅 (室內活動版本)
http://blog.xuite.net/chinglongtin/blog/451100263
而我哋今次又嚟做咩？唔係做住客喇！特別嚟睇「Our SANRIO TIMES」展覽㗎！
由細到大，都有唔同嘅Sanrio卡通人物陪伴住成長，可以睇番晒由Sanrio創立至今推出過嘅公仔，好多個都好熟悉呀！
晴晴睇中咗呢隻小鹿，好可愛！但唔知幾時出㗎呢？一齊入去搵答案囉！~
Our SANRIO TIMES
Sanrio真係帶畀我哋好多回憶！展覧除咗可以欣賞由六十年代至今嘅展品外，仲可以即場學習繪畫唔同卡通人物，好睇又好玩！仲有勁多打咭影相位添！不如一齊穿越時光隧道，一同重拾童年回憶囉！(詳細內容請即按以下相片)
睇完展覽，又點會兩手空空行出嚟丫？晴晴又有收穫喇！Hello Kitty吸塵機？識用呢部之後，就要學埋用屋企果部幫下手做家務喎！XD
我哋去咗新濠影滙嘅「澳門食街遊」開餐，呢度平靚正，如果有「新濠會」咭惠顧部分餐廳仲有9折添㗎！
食飽正餐，當然要食埋甜品，將個肚填得飽一飽啦！如果想了解「澳門食街遊」更多，可以睇番我哋上次嘅報導喔~
澳門食街遊@澳門新濠影滙
http://blog.xuite.net/chinglongtin/blog/425461088
食飽飽，又要為我哋下一個行程而趕路喇！拜拜新濠影滙~
截的士前往即將入住嘅酒店去lu~
「鷺環海天度假酒店」位於路環區，由氹仔搭的士過嚟只需5~10分鐘車程咋！
check-in完之後，即刻可以上房，嚟到咁悠閒寫意嘅酒店，真係行步路都慢啲呀！
我哋揀嘅係「海灘景超豪華間」，房間大，簡潔舒適，而且出到露台仲可以欣賞迷人景色。咁樣先似係渡假加嘛！*o*
澳門鷺環海天度假酒店
遠離繁囂鬧巿，嚟到鳥無人煙嘅路環區酒店，有種世外桃園嘅感覺。雖然呢度冇playhouse、冇大型水上設施，更加冇賭場，但就係因為咁，更覺輕鬆自在，我哋都好滿意呢種悠閒寫意嘅渡假生活呀！(詳細內容請即按以下相片)
入住後嘅第一個活動就係大鬧酒店泳池喇！睇下晴朗玩得幾咁癲？真係丫！可唔可以玩得斯文啲㗎？XD
泳池及按摩浴池
海天一色嘅環境之下玩水特別心曠神怡、身心舒暢。一於抓著熱天嘅尾巴，繼續去玩水囉！(詳細內容請即按以下相片)
玩完水個肚特別餓，搭shuttle出去官也街搵食囉！
每次嚟到官也街有幾件事係必做嘅！到「晃記餅家」買芋頭酥就係其中之一喇！睇下條龍幾咁長？真係堅多捧場客呀！
「露素餐廳」係一間葡國菜小店，上次嚟幫襯已經係N年前，果陣都仲未識晴朗爸爸，特別想嚟緬懷一下~
餐廳設計同佈置上都冇咩變，可以帶埋晴朗一齊嚟重拾番從前嘅味道實在太好喇！
食物水準依然冇變，一樣煮得咁好味，所以我哋始終都係鍾情於小店，食物有冇heart，係食得出嘅！
豐富溫馨嘅一餐，晴朗都好欣賞呢度嘅食物呀！Yummy yummy~
朗朗極速食晒成碗墨汁飯，食到啲牙「黑蚊蚊」，笑死人咩？見到佢哋咁啱食，我哋都好滿足~^^
晚餐特登唔叫太多，諗住要留肚去食甜品丫嘛！繼續響官也街覓食喇喂！~
今次被一間名為「土耳其冰淇淋」嘅雪糕店吸引咗埋去，事關老闆創新幽默嘅賣雪糕手法實在令在場圍觀嘅遊客都捧腹大笑。想從佢手上攞到杯雪糕唔易㗎！
要眼明手快，而且有耐性先得！馬上派朗朗去體驗一下~
老闆真係好搞笑，我哋睇人哋買咗幾轉先決定買，佢每次都可以用唔同方法去捉弄遊客。啲人不但冇嬲，仲笑住咁拎杯雪糕走。開心指數大增呀！好欣賞老闆敬業樂業嘅精神！
咁難先得到嘅雪糕，一定會特別珍惜，特別好味啦！XD
另一件必做嘅事就係到「莫義記」買榴槤雪糕食喇！
榴槤雪糕、大菜糕、土耳其雪糕，個個都有糕食，大滿足！^o^
官也街後面嘅施督憲正街夜景好靚，亦係我哋行去shuttle bus站嘅必經路，一於邊欣賞邊散步，順便減下個大肚腩啦！XD
番到酒店梳洗完睇一陣電視，可能玩得太攰，晴朗都好快入睡喇！咁就過咗旅程嘅第一天~^^
第二朝一早趁晴朗未起身，帶埋相機去酒店附近行下先~
行咗落沙灘，原來由沙灘望番過酒店係咁靚㗎！
一個人聽住海浪聲，吹住海風，慢慢感受，好舒服！好放鬆！
番到酒店發現晴朗已經醒咗！仲睇梗風景添！哈哈！
一家人都好鍾意呢度嘅景色，證明冇訂錯酒店啦！^^
梳洗完後，又去咗玩lu~ 早餐都未食，真係服咗佢喇喇！
玩到餓，就嚟到富有歐陸色彩嘅酒店餐廳度拆豐富早餐，我哋個肚要啟動喇！^o^
Cafe Panorama
豐富嘅早餐，係一天嘅好開始！每次預訂酒店，我都會選擇包埋早餐，貪佢一落樓就有得食，唔駛餓住個肚四出搵食丫嘛！食過先知原來好嘅buffet唔單只響巿中心搵到，路環區都唔錯，大家有機會一定要試試呀！(詳細內容請即按以下相片)
玩...食...玩，今次應該輪到玩喇！我哋去咗酒店嘅Kids Club，入住前向酒店查詢過知道係for細個啲嘅小友玩嘅！所以都冇抱有期望~
冇諗過晴朗四處進行大搜索，仲要玩到忘晒形，小朋友易滿足其實都係一個優點嚟呀！
每一個角落都係咁悠閒舒適，好有渡假feel，去旅行就係想搵番呢種感覺啫！太美好！
就讓我哋將幸福寫意嘅片段好好收藏起來，離開酒店後，又繼續向下一個行程進發喇！
乘搭shuttle到達氹仔新濠天地落車，步行至金沙城中心先去行街食嘢~
期間遇到我哋熟悉嘅Planet-J角色，當然要同佢哋合照啦！如果想了解Planet-J更多，可以睇番我哋上次嘅旅程㗎！
【冒險體驗】Planet J 冒險王國@澳門金沙城中心
http://blog.xuite.net/chinglongtin/blog/515504092
經過禮品店仲要入去貢下添！見到好多「魔石寶寶」，好興奮！但其實我哋屋企已經有三隻啦！XD
呢一層都好多嘢啱小朋友行，衫褲鞋襪通通都有，有間超大型嘅店勁多玩具賣，仲大過香港嘅玩具反斗城呀！Shopping完後，又到醫肚時間喇！
第二次嚟到金沙城中心嘅food court食，貪佢平靚正之餘，種類仲好多，唔同國家嘅菜式都有齊。另外，好欣賞呢度嘅果汁，好味又足料。晴朗都飲到「lam lam脷」呀！行飽、食飽，就去check-in囉！~
澳門喜來登酒店 - 功夫熊貓親子房間
帶住晴朗都試過唔同嘅澳門酒店，但有親子特色嘅都係第一間。酒店在佈置上花咗唔少心思，而且房內所有設備都悉心為小朋友而設，係一間真正由小朋友做出發點嘅房間！晴朗都玩到癲晒！真係住多幾晚都願呀！(詳細內容請即按以下相片)
大鬧完房間一輪，玩到攰就攤響梳化度抖，真係識嘆喇！望住朗朗呢個模樣，開始有啲唔捨得佢喇！事關三日兩夜澳門之旅，朗朗就去到呢度，由於第二日要番學嘅關係，將會跟隨晴朗爸爸先行返港。我哋玩嘅時候會掛住你哋㗎喇！XD
送走咗難捨難離嘅朗朗之後，我同晴晴就向巴黎人水世界出發，仲約埋好友會合添！晴晴有好友相伴，冇咗哥哥陪玩都冇問題啦！(唔好畀朗朗聽到呀...)
澳門巴黎人水世界
在巴黎鐵塔之下暢泳，是何等寫意嘅生活呢？小朋友可以任玩兒童水滑梯、翻斗樂，又可於水花四濺嘅飛船暢玩。大人可以登上12米高嘅滑水道，感受心跳加速嘅瀡梯體驗。真係玩到皺晒皮都唔捨得上水呀！(詳細內容請即按以下相片)
玩完水，好肚餓，孖住好朋友一齊番金沙城中心開餐囉！今餐唔食food court、葡國菜或者buffet，係去打邊爐呀！好豐富㗎！跟住嚟啦！
鮮Xin亞洲火鍋
平時去澳門唔係食buffet就係葡國菜，冇諗過原來打邊爐都咁有驚喜！任食火鍋有齊海鮮、熱食、甜品、水果，而且仲有多款特別嘅秘製湯底揀，唔試過都唔知原來澳門呢邊嘅火鍋餐廳做得咁出色。下次大家過澳門都不妨試試打邊爐丫！值得推介！(詳細內容請即按以下相片)
食飽飽，帶埋好朋友一齊番房又玩到癲晒喇！我同好友都冇佢哋咁好氣，一於佢哋有佢哋玩，我哋有我哋吹水、上網、睇電視，玩到夠先去沖白白囉！
換上酒店提供嘅浴袍好啱身，好可愛！今晚可以同媽媽孖鋪，晴晴勁開心！因為平時好少可以黐實媽媽瞓加嘛！瞓到發開口夢都識笑~ XD
旅程嘅第二天過去，點解時間過得咁快？去旅行個腦就只會想著食和玩，唔想旅程咁快完呀！>.<
晴晴同好朋友一朝早就起咗身喇！皆因之前一晚已經預告過早起身就有大餐食囉！一提到食就特別醒神~ XD
晴晴嘅好朋友係功夫熊貓fans嚟！我哋又陪佢一齊癲下囉！XD
佢哋扮梗咩嘢？我諗要有睇過呢套戲嘅朋友至知喇！^^''' 不過小朋友一於少理，有得捐個頭入去扮下嘢就開心啦！XD
行到去餐廳心急開餐之際竟然發現大排長龍，個肚打晒鼓，點算好？唯有靜心等待啦！@@'''
盛宴 Feast
好多時見網上啲人比較澳門buffet邊間好，盛宴都列於名單之上，久仰大名！終於有機會嚟試下，既期待又興奮！既然咁受歡迎，就真係要試清楚啲喇！(詳細內容請即按以下相片)
今餐食得特別快，唔錯！好合作！因為佢哋趕住去玩丫嘛！我哋又過咗去巴黎人喇！
不過今次唔係嚟游水，係到Q立方王國放電呀！
小朋友們真係好心急，想影張相啫！就已經落後於佢哋。喂喂！唔好賴低我好喎！~o~
Q立方王國
每次計劃澳門行程嘅時候，都好鍾意安排時間到playhouse玩。小朋友可以放電之餘，大人又可以鬆一鬆、抖一抖嘛！今次我哋就去咗開業未夠一年嘅Q立方王國，室內有太空船攀登架、長滑梯、波波池、互動投影機、電影欣賞、益智遊戲板玩，仲有戶外嘅城堡主題攀爬架同旋轉木馬添！小朋友玩兩個鐘都未夠喉，啲電多到冇人有呀！(詳細內容請即按以下相片)
放電過後，我哋番房間收拾好行李，就準備check-out。睇見間房被小朋友弄得七凌八亂，就證明咗我哋響度留下咗幾咁愉快同難忘嘅回憶啦！XD
受颱風影響，好幾個原先計劃咗嘅景點都冇開，好彩的士叔叔提提我哋，如果唔係就要摸門釘喇！結果臨時改去澳門巿中心度行街食嘢~
首先去議事亭前地嘅「黃枝記」度食咗水蟹粥、雲吞麵、蜆介鯪魚球同豉油雞翼，本身只係隨意搵間店醫肚，冇諗過佢哋啲嘢食都整得幾好味喎！
晴晴好欣賞豉油雞翼，而好朋友最鍾意雲吞麵，一碗唔夠分，結果要再叫多碗呀！哈哈！
嚟得議事亭前地，多數都會行埋上去大三巴。期間一定會經過玫瑰堂，每次路過都必定會入去參觀一下~
身為天主教徒嘅我哋，靜下心來禱告，要感謝天主賜與我哋好天氣同愉快嘅旅程呀！
越上就越多人，如果以為平日就可以暢通無阻，咁你就錯喇！呢度真係一年365日都咁熱鬧、咁繁忙㗎！
大人掛住把握最後機會買手信，小朋友就忙住試食，好搞笑！街道兩旁嘅手信店都會不停有得免費試食，如果午餐食得唔飽，響呢度都可以食到飽一飽~ XD
終於見到大三巴！係晴晴期待已久嘅一刻，大開眼界！
事前功夫不可少，預先已經充當導遊，向小朋友簡單介紹過呢度好耐以前係一間聖堂，但被大火洗禮後，再經翻新，就變成為今日嘅大三巴牌坊喇！有故事嘅帶引之下，佢哋對於呢個景點都特別雀躍呀！*o*
一袋二袋嘅手信，過足shopping癮！香港嘅親友有口福囉！
餘下嘅行程係搭的士返酒店攞番啲行李，然後就搭shuttle返碼頭喇！
離開酒店之前，遇到孫悟空同豬八戒，晴晴突然唐僧上身，又幾入戲喎！XD
傳聞中最宏偉嘅中國Show《西遊記》正在金沙城劇場上映，所以佢哋會到處同遊客影相，順便做埋宣傳㗎！對呢個show有興趣嘅朋友可以去佢哋網址睇睇啦！做到10月31號咋！
《西遊記》：http://www.monkeyking.cn
去到碼頭見有啲時間，竟然畀我見到有「樂宮」曲奇賣，馬上買番兩罐先！鬆化好味過香港嘅熊仔曲奇㗎！
快樂不知時日過，又係時候講拜拜喇！
如果你問我三日兩夜玩得夠唔夠，我可以話好過兩日一夜囉！
但實情係仲未夠㗎！
今次旅程係先悠閒，後精彩，大人比較傾向追求舒適寫意，而小朋友冇時停，梗係鍾意玩過不停啦！
兩間酒店各具特色，各擁愛戴！
真係大人同細路都玩到樂而忘返呀！
不過美中不足係有兩個景點都想去玩同介紹下，可惜颱風後需要一啲時間復原。
期望下次再來澳門嘅時候，可以見到澳門已經康復晒啦！澳門加油！
最後，比個行程大家參考下啦！~ 第一天 ~
8:00 到達九龍中港城
8:30~9:00 辦理離境/等候上船
9:00~10:15 船程
10:15~10:45 辦理入境/買電話咭
10:45~11:15 搭酒店shuttle前往新濠影滙
11:15~13:15 參觀「Our SANRIO TIMES」展覽
13:15~14:45 午餐於「澳門食街遊」
14:45~15:00 搭的士前往「鷺環海天度假酒店」
15:00~15:15 check-in
15:15~16:00 上房安頓及換泳衣
16:00~18:00 於「酒店泳池及按摩浴池」玩水18:00~19:00 梳洗及整裝待發
19:00~19:30 搭酒店shuttle前往茵景園，再步行至官也街
19:30~20:00 於官也街買手信及行逛
20:00~21:00 晚餐於「露素餐廳」21:00~21:30 食甜品
21:30~22:00 步行至茵景園及搭酒店shuttle返回酒店
~ 第二天 ~
8:00~8:30 梳洗
8:30~9:00 於「兒童遊樂場」玩樂
9:00~10:15 早餐於「Cafe Panorama」
10:15~11:30 於「Kids Club」玩樂
11:30~12:00 收拾行李
12:00~12:15 check-out
12:30~12:45 搭酒店shuttle前往新濠天地
12:45~13:00 步行至金沙城中心
13:00~13:45 行街shopping
13:45~14:45 午餐於「金沙城美食廣場」
15:00~15:15 於「喜來登酒店」check-in15:15~15:40 上房安頓及整裝待發15:40~16:00 步行至巴黎人
16:00~18:00 於「巴黎人水世界」玩水18:00~18:40 梳洗18:40~19:00 步行返金沙城中心
19:00~21:30 「鮮」打邊爐晚餐
~ 第三天 ~
8:00~9:00 梳洗9:00~10:00 早餐於「盛宴」10:00~10:20 步行至巴黎人
10:20~12:10 於「Q立方王國」玩樂12:10~12:30 步行返金沙城中心
12:30~13:00 執拾行李、check-out及行李寄存13:00~13:15 搭的士前往議事亭前地
13:15~14:45 午餐於「黃枝記」
14:45~16:15 遊覽聖母玫瑰堂、大三巴及買手信
16:15~17:00 搭的士返回酒店及提取行李
17:00~17:30 搭酒店shuttle前往外港碼頭
17:30~18:05 於外港碼頭行逛及購買「樂宮」曲奇
18:05~18:35 辦理離境/等候上船
18:35~19:50 船程
重點注意：
- 我哋有時需要致電酒店及餐廳聯絡先買電話咭，如果大家冇呢個必要，只需要上網嘅話，其實去到酒店、shuttle bus或船上都有wifi，唔買都冇問題！
- Our SANRIO TIMES展覽經已完結，大家可以重溫我哋篇blog，睇咗當去咗囉！XD
- 鷺環海天度假酒店嘅shuttle bus冇響官也街設站, 要響茵景園站落車後行大概10-15分鐘，其實都唔遠，傾下講下好快到~
- 諗住今次響九龍中港城上落船近啲屋企，方便啲！點知等待登記入去，同等待上船都等咗好耐。時間冇上環果邊咁準時，所以下次都係去番上環果邊搭船喇！
- 想買平船飛，梗係幫襯工聯會啦！噴射飛航來回港澳船票每套$250，買六套都係$1500，簡直係全城至抵！不過據聞2017年內嘅船飛經已沽清，想買平飛嘅可以考慮金光飛航嘅生日優惠。詳情可<按此>觀看~
- 今次旅程事前一波幾折，唔知點解今年咁多颱風，其中一個仲要打到澳門正一正。打風後，兩間酒店嘅泳池都未知幾時可以開放，好彩嘅係在颱風後兩星期已修理好並且回復正常。到出發果個星期，天文台又話將會有風打到嚟喎！真係搞到個心籮籮攣㗎！要讚一讚booking.com，因為佢哋跟得好好，仲提我如果入住當日又遇正打8號風球，就打番上去安排延期，感覺服務好有承擔，靠得住亦信得過！下次要搵酒店都會再幫襯佢哋呀！
旅行費(4位計)：
噴射飛航來回港澳船飛 x 4套 - $1000
「Our SANRIO TIMES」展覽門票 x 4張 - $600
「澳門食街遊」午餐 - $218.9
鷺環海天度假酒店海灘景超豪華間(包早餐) x 1間 - $1369.11
於泳池及按摩浴池租水泡 x 2個 - 57.5
「露素」dinner - $566
於官也街食甜品 - $130
買手信 - $510
「金沙城美食廣場」lunch - $384
喜來登酒店家庭套房 x 1間 - $3827
巴黎人水世界門票 x 2張 - $320
「鮮」晚餐 - $1315.6
「盛宴」早餐 - $501.6
「Q立方王國」x 2大2小門票- $260
租locker - $20
「黃枝記」lunch - $374
的士費 - $274
電話咭 - $50
TOTAL合共：$11,177.71
精華片段：
想知更多澳門親子遊好地方？睇埋以下連結啦！http://blog.xuite.net/chinglongtin/blog/541551583
FIND US on:
BLOGs:
CONTACT US:
