【散水餅推介】MILK TOP 雪糕 ‧ 布甸

響呢間公司做咗咁多年，同啲同事感情咁好，好唔捨得呀！散水餅當然要嚴選啦！有想過送蛋糕或者cupcake，但公司附近又冇咩好選擇。上網做過re-search，發現送雪糕都幾好喎！唔食雪糕嘅又可以送布甸。一於訂嚟做散水餅，過番個甜甜嘅last day啦！

事先已經請同事揀選口味，集合晒資料先去訂。果然不出所料，雪糕同布甸都有人喜愛~

為食兵團梗係要預先幫手試試味啦！

晴晴揀咗曲奇雪糕，雪糕有曲奇味之餘，仲夾雜咗粒粒曲奇，好啱晴晴口味呀！

朗朗揀雪糕一向都好專一，朱古力味好濃郁，果然係名乎其實嘅「特濃朱古力」~

晴朗爸爸就揀咗生薑雪糕，老人家口味！XD 食落個味好似食梗薑汁撞奶，又唔錯喎！*o*

我就揀咗新出嘅粟米雪糕，感覺好似飲梗粟米湯咁，味道整得真係好似，好好味！

Milk Top嘅產品全部都係採用北海道3.6牛奶，所以牛奶布甸特別滑，牛奶味相當濃郁~

綠茶布甸嘅綠茶味好重，仲要整得咁滑，超like呀！

last day可以同班同事去飲茶farewell係最開心㗎！佢哋仲集合咗咁多年來嘅相，整成一本相冊畀我，好有心思，巧感動喔！*o*

臨走之前，為公司同事送上MILK TOP雪糕、布甸，佢哋都食得好滿足！我食過番尋味，今次試柚子雪糕，雪糕夾雜著柚子粒粒，堅正！大家都食得好開心呀！^o^

之前未試過呢個牌子嘅雪糕，聽朋友講雪糕質感比較鬆散，我仲擔心貨到會失望添！但我都試咗幾款口味嘅雪糕同布甸，質感軟滑得嚟又重牛奶味，而且唔會太甜，好好味呀！全部都好滿意！最正嘅係訂滿$800就可以免費送貨，咁就可以慳番去買同運送嘅時間啦！

一間睇住我拍拖、結婚、生晴朗嘅公司，嚟到今日，要劃上句號喇！一路以來，好感激班同事嘅包容同愛護。估唔到嚟到最後同各人say byebye果一刻真係有衝動想喊，但叫自己強忍！離開係為未來作更好嘅準備！我都要收拾心情，繼續為我嘅路而奮鬥喇！

MILK TOP (HOME MADE ICECREAM)
地址：葵涌和宜合道63號麗晶中心A座23樓11-19室
電話：2428 3101
網址：http://www.milktop.com.hk
facebook：https://www.facebook.com/milktop.hk

---

FIND US on:
       

BLOGs:

 

CONTACT US:

【玩齊各大玩具品牌】玩具"反"斗城「Toy Fair 2018」

一聽到「玩具"反"斗城」，有邊個小朋友會冇反應㗎？晴朗由細到大都好鍾意到「玩具"反"斗城」，除咗可以摸下、玩下唔同玩具之外，最重要當然係可能會有斬獲啦！感謝「玩具"反"斗城」嘅邀請！「Toy Fair 2018」有好多嘢玩！就好似去咗一個超大嘅遊樂場咁呀！而且費用全免！集齊吸印，仲送傑菲故事書一本添！一齊嚟睇下有咩啱玩啦！

<兩米身型Super Wing杰特高高掛>

一入門口就已經見到大大隻紅卜卜嘅Super Wing懸掛響半空中喇！咁吸睛點可以唔過去影相呀？

《SUPER WINGS》故事講述飛機機器人杰特同一班超級飛俠伙伴環遊世界，為小朋友遞送包裹及解決困難。

<1.5米高戰車賽道>

Majorette戰車賽道有1.5米之高，賽事一觸即發！先係朗朗嘅紅色車仔領先，但過完第二個彎反咗車，被晴晴果架過咗頭兼嬴埋添呀！XD 由於唔服輸，佢哋賽完一次又一次，好好玩咁喎！

同場亦設有大型車道畀小朋友玩車仔，好似成個模擬城巿咁！玩車仔嘅時候，就更覺逼真喇！

Majorette係來自法國嘅車仔品牌，相信好多小朋友都玩過啦！響呢個影相位影相都可獲吸一個印仔㗎！cheers~

<5米長Globber跑道>

可以響5米長嘅Globber跑道上飛馳，感覺一定好正喇！連平時冇玩開滑板車嘅晴朗都玩得似模似樣呀！

<Slimy鬼口水系列>

到Slimy呢個攤位可以大玩鬼口水，晴朗完全唔駛講解，一埋去就玩過痛快，仲創作出唔同形狀同玩法添！睇住佢哋玩我都覺得好好笑~ XD

鬼口水質感有啲似吹爆咗嘅吹波糖，但玩完之後唔會黏手，成份天然，安全可靠。晴朗勁鍾意玩呢個呀！@@'''

<StikBot動畫創作>

嚟到StikBot攤位，可以自製動畫，即時分享。只要你有無窮嘅想像力同創意，就可以為StikBot注入生命喇！

每完成一格動作，就按一下手機app上的「拍下」鍵，每次擺動啲公仔唔駛郁動好大，集齊多格就可以整合成一套動畫~

啲公仔就好似火柴人咁，可以輕易變出唔同造型同姿勢~

播放動畫嘅時候係最期待同興奮㗎！買盒番屋企，小朋友都可以學做小小動畫師啦！

<Turning Mecard魔車戰魂格鬥場>

響格鬥賽道上，晴朗要將魔車瞄準目標，推向終點~

一旦車仔同魔卡接觸就會變身㗎喇！

本來平平無奇嘅車仔突然變成型格魔車，好神奇呀！

同場亦設有較大型嘅魔車，過去感受下囉！

呢部一接觸到魔卡後即刻變咗一隻蜘蛛狀嘅物體，機關設計得好細緻，勁！

經過多次練習之後，朗朗都能夠一推即中喇！

每張魔卡上面都有攻擊點數，想同對手一決高下？當然越高攻擊力越強勁啦！

繼續秘密練兵！加油！

要將蜘蛛狀嘅魔車還原都係一門學問嚟㗎！^^'''

晴朗未接觸過呢款玩具，特別覺得有興趣！仲想帶晒咁多架魔車番屋企添！認真大想頭~ XD

<Hatchimals + Kinetic Sand>

動力沙？大家都應該玩過喇！但係要響啲沙裡面搵番啲迷你魔法蛋同埋魔法寵物造型公仔出嚟！你又試過未呢？

晴朗合作搵咗好多，繼續努力！

呢個影相位色彩繽紛，好靚呀！兩隻魔法晴朗就係咁孵化咗出嚟囉！XD

<Lego Mosaic Maker>

同場亦設有全亞洲首次登陸嘅Lego Mosaic Maker，只要入去坐抵影張相，一份專屬於你嘅俏像lego就會出現喇！

其實Toy Fair仲有好多其他攤位，我哋未有時間玩晒！要留待大家去嘅時候逐一體驗喇！
- WOW Stuff：飛碟高手真人表演，欣賞神秘UFO響空中飄浮
- Boogie Board：小朋友可以響電子手寫板上書寫或繪畫，盡情發揮無限創意
- 4M AR Dino：基因解碼後，暴龍實境活現眼前
- ZIPES Speed Pipes：拼砌出不同軌道，令火箭車順利奔馳至終點
- The Jelly Bean Factory：於影相位拍照及免費換領試食裝

入口就有小冊子攞，集齊8個玩具品牌吸印，就送傑菲故事書一本。對於晴朗嚟講，要吸夠印仔完全冇難度。本小冊子仲有埋海港城指定食肆飲食優惠添㗎！

在場玩都未夠喉，晴晴番到屋企有得即拆禮物繼續玩Hatchimals，做佢哋真係開心喇！

朗朗都唔輸蝕，有Magetron機械人玩，開心到震啦！

我哋仲買咗基因解密暴龍實境玩具添！玩法係先將埋藏響石頭內嘅恐龍化石掘出，然後download手機app就可以將暴龍重現，好期待！不過突然太多玩具，呢件要留待遲少少先拆嚟玩喇！^^

今次係我哋第一次參加玩具"反"斗城嘅Toy Fair，事前真係冇諗過會有咁多嘢玩㗎！總共有18個著名玩具品牌參與，晴朗可以免費任玩多個遊戲區，勁開心啦！晴晴最鍾意玩鬼口水，而朗朗就最愛玩沙。有啲玩具仲要係佢哋未曾玩過，所以都顯得特別興奮雀躍呀！Toy Fair期間，「星卡」會員購物滿$599，可獲$80優惠券一張，買任何產品又有雙倍「星卡」優惠。仲等咩呀？快啲帶埋小朋友嚟到尖沙咀海港城玩具"反"斗城大玩特玩啦！

精華片段：

《玩具"反"斗城「Toy Fair 2018」》
日期：4/1/2018 ~ 14/1/2018
時間：12:00 ~ 17:00及18:00 ~ 21:00
地點：玩具"反"斗城 (尖沙咀海運大廈旗艦店)
參與玩具品牌：Majorette、Boogie Board、4M、Slimy、Hatchimals 、Kinetic Sands、Audley Super Wings、Turning Mecard、Globber、Zipes Speed Pipes、Stikbot、Jelly Bean Factory、WOW Stuff、Fun Promotion及Alpha Group (Blazing Team、Screechens、Skyrover、Drone Force
網址：https://www.toysrus.com.hk/come-in-play/zh-hk

「Toy Fair 2018」童真 x 玩具人偶花生騷
日期：2018年1月7日
時間：下午3時至下午4時
地點：海港城海運大廈地下中庭

「Toy Fair 2018」卡通人物見面、大巡遊及台上表演
日期：2018年1月6-7日、1月13-14日
時間：中午12時至下午6時30分
地點：海港城海運大廈地下中庭

「Toy Fair 2018」面部彩繪服務及好玩自拍區
日期：2018年1月5日、1月8-12日
時間：下午2時至晚上7時
地點：海港城海運大廈地下中庭
(費用全免；每日名額有限，額滿即止)

---

FIND US on:
       

BLOGs:

 

CONTACT US: