2020年4月3日 星期五

【苦盡甘來】投考公務員之堅毅持久戰


自從響個人facebook發放好消息後,好多朋友都問我投考公務員嘅嘢,真係冇諗過大家咁有興趣喎!會唔會係因為而家呢個時勢都想搵番份較為穩定嘅工作?無論係咩原因都好,就等我分享一下心得,等有興趣投考嘅朋友可以更快捷取得成功啦!
首先,可以睇番個facebook post,有助大家更了解我要考政府工嘅來龍去脈:
***********************************
26/03/2020

好搞笑呀!平時多數係我主動話買甜品食,但今次老公講完一次不如買蛋糕慶祝,我冇理佢,之後佢又再講,仲send埋Tony Wong新出品介紹畀我,佢似乎仲開心過我囉!
為咩要慶祝?要由五年幾前開始講起....
果陣番梗一份我曾經以為可以做到退休嘅工作,即係我對上一份工,一做就做咗11年。做到第9年嘅時候,有一日,老公突然講咗句話覺得公務員應該幾啱我,加上公司生意上有啲變動,又試過裁走幾個同事,我開始為將來諗多一啲。5年多以來,見政府工已經達10次之多。每次等待數月先出結果果種煎熬,經歷過無數次失敗,真係幾苦、幾折磨。當中唔係冇成功過,但就係未遇到一份自己認為滿意嘅,繼續再接再厲,我相信只要唔放棄,總有一次係會得㗎!
上年8月終於攞到正式公務員嘅入場券,仲記得收到消息果一刻,我攬住身邊個同事大叫咗出嚟!不過職級上,仍未太係心目中理想,所以我仍然繼續keep住嘗試!
今個月頭,我套戰衣已經係第10次大派用場喇!早幾日終於收到好消息!今次嘅職級係我夢寐以求,亦都唔係第1次考。得咗!我終於得咗喇!咁多年嚟嘅努力原來冇白費!呢幾日回想起自己一直向著目標前進嘅日子,不斷循環於期望、失望、氣餒、重新振作嘅日子,個鼻就會酸起來。今天,終於苦盡甘來!仲教識咗小朋友失敗乃成功之母嘅道理添!hehee...
我嘅人生將會有很大的轉變!十分期待!感謝祢為我安排好一切!一直所想未能達成,原來係想我先經歷磨練,準備得更好去迎接今天。冇錯呀!呢兩年嘅非公務員(合約)工作,真係擴闊咗無限視野,獲益良多。係一個好好嘅timing去面對新挑戰!我會繼續為人生、為家庭而加油!
***********************************
好多Fans都知道我幾年前開始為工作晉升嘅事而忙,甚至有段時間因為要溫習而暫時冇時間寫blog,當時冇交待太多,但其實一直就係為考政府工而努力呀!近幾年,我都見過10份政府工喇!由申請、準備至面試,其實都落咗好多心機,有好多嘢要注意,綜合一下資料畀大家啦!
參考天書
坊間有好多投考公務員嘅所謂「天書」,其實就係某啲熱門職位嘅投考攻略。當年為咗考CA(Clerical Assistant 文書助理)同埋ACO(Assistant Clerical Officer 助理文書主任),我就買咗呢兩本書~
所謂嘅「天書」可以幫助了解你所投考果個職位嘅嘢,以CA/ACO為例,首先要考skill test(中、英文打字同埋word+excel),佢會詳細列出各項要求,咁就可以好好練習。當skill test合格後,就會被邀請出席interview。書中會列出interview流程、過來人心得、參考試題、考官給分要求....等等,咁就可以好好準備,面試嘅時候更得心應手啦!
而家考公務員位都一定會搭單考埋基本法,所以唔好溫漏呀!唔係講笑,我真係上網睇晒全本基本法,有關網址可到:
https://www.basiclaw.gov.hk/tc/basiclawtext/images/basiclaw_full_text_tc.pdf
睇完又唔代表記得嘅,所以就係靠上面果本基本法測試,做多啲試題,記憶就會深刻啲喇!
有啲人會覺得天書冇用,但其實對於未考過嘅人嚟講,真係可以掌握得更好。當你對整個流程熟悉啲,自然信心大啲,發揮得好啲啦!
參考討論區
好多時政府一出招聘,討論區相應就會有人開post討論,熱滿位就一定有,可以去高登、連登、discuss、baby kingdom等討論區八下。我自己就主要去discuss攞料~
網址:https://www.discuss.com.hk
論壇:時事財經>各行各業>政府服務界

入到「政府服務Civil Service」版面,就會見到有各式各樣嘅政府工討論~

以CA為例,2018年一出公開招聘,就已經有人擺招聘資料上嚟討論~

上討論區唔係只為八卦,主要可以留意下個職位截止報名後,幾時開始會有人收到skill test email,而收到邀請嘅人又係幾時申請個位,有時候係會有啲關聯,咁就可以推算一下幾時會論到自己。當過咗skill test後,就會等收interview email,又會有人響討論區放料「我會響(日期)interview,之前係(日期)skill test嘅」,咁又可以推算一下自己大概幾時in喇!Interview後,開始有人收到offer消息,又可以了解佢哋係邊日interview,睇下自己interview果日派咗offer未。例如你係3月2號in嘅,收到offer嘅人係3月5號in,咁你咪知自己in得唔夠人好,未能成為所謂嘅「尖子」囉!
CA/ACO,甚至PSII(Personal Secretary II 二級私人秘書)玩法大同小異,就算眼見人哋收到offer而自己仲未收到都唔駛焦急,有可能係等放大榜嘅時候先出waiting list畀你。呢啲職位都會設一個放榜時間,多數係出招聘嘅一年後。夠分數而又未收到offer嘅人會落入waiting list(備選名單),而唔夠分數嘅亦會響呢個時候收到email通知reject,即代表落選,咁就唯有下屆再努力過喇!
入咗waiting list嘅都值得開心㗎!因為當之前已收到offer果班尖子收晒report duty後,就輪到派offer畀waiting list嘅人,方式係會按應徵者分數高至低咁派,所以大家響放大榜之後,記得去查分呀!知道自己幾多分,就可以推算一下大概幾時會收到offer。以往幾屆CA/ACO/PSII waiting list人士都最終全部收到晒offer,不過等待嘅日子好漫長囉!要畀啲耐心去等候。至於點樣查分,放榜後實有人會響討論區教,每個職位唔同,我就唔響呢度詳述喇!可以畀今屆(2018年)CA waiting list人士收offer嘅日期資料大家參考下:
面試分數 收offer日期
116~118 2019年8月16日
113~115 2019年9月19日
110~112 2019年11月6日
107~109 2019年12月9日
104~106 2020年1月9日
100~103 2020年2月28日
今屆CA響2019年7月29號放大榜,118分以上已經屬於尖子,而考得100~118分嘅就落入waiting list,放榜後要成7個月先派得晒全部offer。如果由2018年8月出招聘開始計起,由申請至到入職分分鐘歷時兩年,所以申請政府工係可以好考驗你嘅耐性㗎!XD
加入群組
響討論區攞料嘅同時,可以留意一下有冇人為個post開whatsapp或telegram group,好多時傾傾下就會有人提議開group傾,咁你又可以加入一下。入group傾可以更緊貼行程㗎!對於幾時會到自己skill test/interview可以更準確推算,大家亦會討論入咗邊間房考、邊啲考官好唔好、應考注意事項等等,更會分享番唔同階段嘅心情,可以互相分擔同支持,呢一班戰友好有可能會成為你將來嘅同事,甚至乎好朋友,所以如果有group記得要加入喇!
坊間應試班
坊間有唔同機構為熱門政府職位開辦應試班,CA/ACO/PSII都會有電腦技能測試/面試嘅導引課程。我都曾經上過,攞到好多料。佢哋會邀請政府內部經驗人士出嚟分享注意事項,亦會邀請同學出嚟模擬面試,過程中都tip到唔少題目。不過要留意嘅係,上完唔代表interview一定得㗎!但就可以令你準備得更好。我之前就響文總上過,真係學識多咗!唔單止應試上需要注意嘅嘢,就連政府內部嘢都會了解深咗,大家有興趣可以留意下呀!
香港文書職系公務員總會:http://clerical.org.hk
Interview形式
政府工面試內容一般會分幾part,以CA/ACO/PSII為例,首先會請你自我介紹,可以預備約1分鐘嘅內容,介紹完之後,考官會向你提問,例牌嘢會問點解會申請呢份工?知唔知呢份工係做啲咩?點解我哋要響眾多應徵者中揀選你?點解會打算轉工?...等等。然後,就會問處境題,例如兩個上司同時交文件畀你話好急,你會點樣處理?突然有巿民到訪大吵大鬧要求見你上司,你會點樣應付?上司去開會點知漏咗份文件,你會點辦?...等等。接住落嚟,就會係時事題,會考一啲民生熱滿話題,睇下你有冇留意平時身邊發生梗嘅事。例如美食車、中醫中藥、樓宇更新大行動2.0、的士扣分制、公屋輪候時間、環保問題...等等。之後,會畀一篇同政府有關嘅英文文章你讀,讀完需回答考官兩條問題,答案可以響文章度搵番出嚟!最後,會問3條基本法問題(只限CA)。臨走前,考官仲會問你有冇問題,一般都答冇㗎喇!以免講多錯多!
至於ACO/PSII點解唔會響面試過程中考基本法,因為響面試前已經要入一間房仔度進行筆試。考過一次基本法筆試,成績就係終生,下次考番同類職位,可以申請豁免應考。不過有一點要留意!你亦可每一次都選擇應考基本法筆試,但政府只會使用你最近一次嘅成績。即係如果上次考到73分,今次再考得66分,之後想申請豁免就只會承認你66分嘅成績,所以係咪去博一博更好成績,就要考慮清楚喇!當有應徵者面試同你同分時,政府會睇埋你基本法分數高低去考慮請邊一位。
CA嘅面試一般唔需要用到英文對答(除讀英文文章部份外),而ACO/PSII就會隨時要用英文,當考官用英文問,你就用英文答,用中文問,就中文答。隨機應變!
著咩嘢去面試係好多人嘅疑問,我見過有人著casual wear,亦有人T-shirt、牛仔褲嚟應試。我想講政府都係比較傳統,亦十分著重考生衣著,如果唔係畀分項目之中就唔會有「Manner and Disposition」啦!儀表好重要,記得要full suit去見,著到成個行政人員咁就啱㗎喇!我套戰衣係趁G2000開倉買嘅,雖然已經唔係新款,但足以應付畀分你嘅考官。另外,身上啲金銀珠寶就唔好戴去喇!個頭亦都唔好染到五顏六色,指甲都唔好整到鬼五馬六。總之,簡潔淡妝就ok喇!切勿濃妝去見呀!
面試禮貌你要知!入房前記得敲門,入到去切勿拉櫈就坐,你估去茶餐廳食嘢咩?XD 見到考官要講「早晨/午安」,考官請你坐,先講「thank you」然後坐。面試過程中,遇到唔識答,可以先停一停,諗一諗,再回答。對問題唔清楚,可向考官問多少少,再分析、組織,然後回答。如果真係唔識,問題就冇得轉㗎喇!可以禮貌地同考官講「雖然對呢方面資料唔太熟悉,但我個人認為....」,點都要答得出一啲睇法,最緊要有邏輯同講出重點,要盡力發揮你嘅分析能力。篇英文盡力讀,唔識讀都盡力併音,切勿skip咗某啲字唔讀。當考官宣布面試完畢,臨走前記得講「多謝晒你哋嘅時間,拜拜!」。全個過程要保持微笑,禮儀細節要做好,考官就係會響呢啲微細部分加分㗎喇!
時間方面,一定唔可以遲!上堂聽阿sir講過一遲咗,接待你果位職員就會通風報訊畀考官知,咁到時就算你in得幾好都白費心機。我就慣常比面試時間早1.5~2小時去到附近,嘆番個早餐或咖啡先去in。到達面試地點時間亦要比實際面試時間早最少半小時,因為職員仲要啲時間同你對番學歷同工作資料,總之有早冇遲就啱喇!
聽聞面試成唔成功,其實好講考官鍾唔鍾意你,好主觀!而響你入去房之前,佢哋已經睇晒你背景,有幾大機會已經心中有數。我哋可以做嘅,咪盡力表現好自己囉!其他嘅,就平常心啦!
以下係CA/ACO/PSII嘅分紙,畀大家參考下考官比較注重邊方面能力啦!都係大同小異嘅項目,總分200分:
CRE(綜合招聘試)/BLT(基本法測試)/JRE(聯合招聘考試)
係咪一定要考咗CRE/BLT/JRE先可以考政府工呀?咁要睇下你想考咩位,好似以上講過嘅CA/ACO/PSII位都無須有CRE/BLT/JRE成績已可申請,但如果你已經考咗嘅話,當然比起其他冇考過嘅人更具競爭性啦!不過相信持有CRE/BLT/JRE成績嘅人,較為傾向考更高職位,如AO(Administrative Officer 政務主任)、EOII(Executive Officer 二級行政主任)等等。
CRE共有3份試卷,包括中文運用、英文運用、能力傾向測試,而BLT即係基本法測試,4份試卷都係以MC題形式出題。大部份需要學位或專業資格嘅職位都會要求申請人響CRE攞到一定成績,部份職位亦會要求申請人響能力傾向測試取得合格先接受申請,而部份職位亦會用BLT成績嚟作考慮因素。有啲職位係需要你持有JRE相關成績,但你必須響CRE考到所需成績先可以去考JRE。JRE試卷就唔會再係MC題形式㗎喇!據聞係要寫論文咁。我未經歷過,實際就唔太清楚!呢啲考試同樣都有出天書,有興趣嘅不妨自行上網或到書局搵多啲資料啦!
留意招聘
我慣常會用手機apps去睇有咩新職位空缺,大家可以去google play或app store搜尋「政府職位空缺」下載~
 
你亦可到公務員事務局網站瀏覽:
https://www.csb.gov.hk/tc_chi/recruit/7.html
公務員位即係會按公務員試用條款受聘三年,通過試用期後,就可獲考慮按當時適用嘅長期聘用條款聘用。CA/ACO/PSII/AO/EOII就係屬於公務員位喇!而非公務員位,即係按合約形式受聘,無論續咗幾多年約,都唔會轉成為公務員位㗎!申請嘅時候就要特別注意喇!
聽聞嚟梗8月又會再公開招聘CA/ACO,有興趣嘅朋友就要多加留意!有人講過CA嘅工作就好似私人公司嘅Office Assitant,而ACO就類似Clerk。萬一你ACO考唔到,而CA有offer,如果你係一心想做政府工,都建議你入咗政府先。唔好睇少CA呢個位,因為做滿3年就有資格內部應徵ACO,內部考當然比起公開招聘機會大啲啦!另外,亦唔好錯過ACO公開招聘,考官見你已經做梗CA,相信都會加分,會比一般人更有優勢㗎!呢啲位一般過萬人申請,空缺就只得幾百(PSII)至千幾個(CA/ACO),你諗下競爭係幾咁激烈呢?好好裝備自己啦!我響interview之前已經開始讀梗同個post相關嘅課程,機會永遠係留畀有準備嘅人。
有關考政府工嘅嘢,暫時分享住咁多先!資料上未必係好全面,亦冇咩內部消息,但就係我個人嘅親身經驗之談。之後嘅,就要靠你自己喇!見工都好講運氣,祝大家都能夠踏上成功之路!享受苦盡甘來嘅滋味!最後,送上我嘅座右銘 -「堅定方向,不斷前行」!加油!



FIND US on:
  "  "   
BLOGs:

 
CONTACT US: